काठमाडौं, १६ वैशाख– संविधान संशोधनको पक्षमा मतदान गर्न प्रमुख प्रतिपक्षी नेकपा एमालेलाई मनाउने कांग्रेस सभापति शेरबहादुर देउवाको प्रयास पुनः असफल भएको छ ।

संविधान संशोधनका विषयमा कुरा गर्न देउवा शनिबार एमाले अध्यक्ष केपी ओली निवास बालकोट पुगेका थिए । कांग्रेस बरिष्ठ नेता रामचन्द्र पौडेल र नेता कृष्ण प्रसाद सिटौलालाई साथ लिएर बालकोट पुगेका देउवाले एमाले अध्यक्ष ओलीबाट ‘संशोधनमा समर्थन गर्न नसकिने’ जवाफ पाए ।

साथै एमाले अध्यक्ष ओलीले संविधान संशोधनका लागि एमालेबिना दुईतिहाइ पुर्याउँछु भन्ने भ्रम नपाल्न पनि देउवालाई आग्रह गरे ।

यसअघि प्रधानमन्त्री प्रचण्डले पनि ओलीलाई संशोधनका पक्षमा ल्याउन हरसम्भव प्रयास गरेका थिए । तर, ओलीले कुनैपनि हालतमा संशोधनको पक्षमा ‘मतदान’ गर्न नसकिने बताएका थिए ।