बालुवाटारमा ओली र प्रचण्डको निर्णायक वार्ता

सत्तारूढ दल नेपाल कम्युनिस्ट पार्टी (नेकपा) भित्रको विवाद उत्कर्षमा पुगेको समयमा सहमतिको प्रयास स्वरुप अध्यक्ष एवं प्रधानमन्त्री केपी ओली र पुष्पकमल दाहाल 'प्रचण्ड'बीच प्रधानमन्त्रीको सरकारी निवास बालुवाटारमा वार्ता जारी छ ।

वार्ताका लागि शुक्रवार मध्यान्ह १२ बजे प्रचण्ड बालुवाटार पुगेका थिए । पार्टी एकता बचाउन निर्णायक वार्ता गर्ने भन्दै स्थायी कमिटीको बैठक शनिवारसम्मको लागि स्थगित भएको छ ।


Advertisement

वार्तामा प्रधानमन्त्री ओली र अध्यक्ष प्रचण्डसँगै नेकपाका महासचिव विष्णु पौडेल र स्थायी कमिटी सदस्य जनार्दन शर्मा पनि रहेको स्रोतको दाबी छ ।

नेकपामा सानातिना विवादहरू आइरहने भएपनि गत वैशाखको दोस्रो साताबाट विवाद बढ्दै गइरहेको हो । ओलीले पार्टीभित्र छलफल नगरी दल विभाजन खुकुलो पार्ने अध्यादेश ल्याएपछि ओलीइतरको समूह असन्तुष्ट छ ।


Advertisement

सचिवालयले हल गर्न नसकेका विषयहरू स्थायी कमिटी बैठकमा आउनु पर्ने भन्दै नेकपाका स्थायी कमिटीहरूले आह्वान गरेको बैठक ओलीले निरन्तर टार्दै आइरहेका थिए ।

पार्टीभित्र निरन्तर बढिरहेको असन्तुष्टि सम्बोधन गर्न भन्दै ओली दुई साताअघि स्थायी कमिटी बैठक बोलाउन राजी भए । तर आफू चाहिँ बैठकमा सहभागी भएनन् ।

स्थायी कमिटी बैठकमा निरन्तर राजीनामाको कुरा उठेपछि ओलीले बिहीवार बैठक स्थगित गरेर वार्तामा आउन आफूइतरका नेताहरूलाई चुनौती दिएका थिए ।

पार्टीभित्र आएको संकट फूट उन्मुख भएको भन्दै नेकपाका नेताहरू चिन्तित बनेका छन् । अध्यक्षद्वयलाई निरन्तर वार्ता गरेर जारी संकट हल गर्न नेताहरूले निरन्तर खबरदारीसमेत गरिरहेका छन् ।

शुक्रवार मन्त्री तथा स्थायी कमिटी सदस्य घनश्याम भुसालको मन्त्रीक्वार्टरमा दोस्रो पुस्ताका नेताहरू भेला भएर पार्टी एकतालाई जसरी पनि जोगाउने भन्दै बहसको थालनी गरे । छलफलमा ओली, प्रचण्ड र वरिष्ठ नेता नेपालपक्षीय नेताहरू सामेल थिए ।

बिहीवार स्थायी कमिटी बैठक चलिरहेको बेलामा मन्त्रिपरिषद बैठक डाकेर संसद अधिवेशन अन्त्य गराउने प्रधानमन्त्रीको निर्णय थप विवादमा परेपछि नेकपाभित्रको संकट थप गहिरिएको हो । समाधानका लागि अध्यक्षद्वयबीच भेटघाट र वार्ताको कुनै विकल्प नरहेको भन्दै दोस्रो तहका नेताहरूले पनि निरन्तर दबाब दिइरहेका छन् ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्