०२ साउन २०८३, शनिबार
फ्रान्सका प्रधानमन्त्री एडूआर्ड फिलिप्पेले पदबाट राजीनामा दिएका छन् तर नयाँ मन्त्रिपरिषद् गठन नहुँदासम्म उनी कार्यवाहकका रूपमा रहने फ्रान्सेली राष्ट्रपतिको कार्यालयले शुक्रवार जनाएको छ ।
राष्ट्रपति इम्मानुएल म्याक्रोंले फिलिप्पेको राजीनामा स्वीकार गरेका छन् । सन् २०१७ मा प्रधानमन्त्री बनेका फिलिप्पेले नयाँ सरकार गठन नहुन्जेल मन्त्रीहरूका साथ सरकार चलाइरहने बताए ।
म्याक्रोंले राष्ट्रपति कार्यकाललाई नवीनता दिने प्रतिज्ञा गरेपछि प्रधानमन्त्रीको राजीनामा आएको हो । बिहीवार उनले अब नयाँ समूहले आर्थिक पुनरुत्थान तथा पुनर्निर्माणको जिम्मा लिने बताएका थिए ।
राष्ट्रपति कार्यालयले फिलिप्पेको बहिर्गमनको कारण खुलाएन । उनलाई पुनर्नियुक्ति गरिने विषयमा पनि कुनै संकेत दिइएको छैन । मन्त्रिपरिषद् हेरफेरमा यसअघि प्रधानमन्त्रीलाई दोहोर्याउने चलन छ ।
आजै नयाँ प्रधानमन्त्रीको घोषणा हुने स्थानीय सञ्चारमाध्यमले जनाएका छन् ।
फिलिप्पेले हाभ्र शहरको मेयर हुन चाहेको बताएका छन् ।
