पार्टीभित्र देखिएको विवाद समाधानको प्रयास स्वरुप सत्तारुढ नेपाल कम्युनिस्ट पार्टी (नेकपा) सचिवालय बैठक बालुवाटारमा शुरू भएको छ । 

स्थायी कमिटी बैठक स्थगित गरेर सहमतिको प्रयासका लागि भन्दै सचिवालय बैठक बस्न लागेको हो । 

असार १० गतेदेखि शुरू भई पटक–पटक स्थगित हुँदै आएको सचिवाल बैठक आइतवारसम्मको लागि सारेर सचिवालय बैठक बसेको छ । सचिवालय बैठकअघि प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच शनिवार छलफल भएको छ ।

असार १० गते शुरू स्थायी कमिटी बैठकले निकास दिन नसकेपछि नेकपाभित्र केन्द्रीय कमिटी बैठक बोलाउने तयारी भएको थियो । केन्द्रीय समितिमा लैजानुभन्दा सचिवालय बैठकमार्फत निकास खोज्न भन्दै शनिवारका लागि सचिवालय बैठक बोलाइएको हो । 

पछिल्ला दिनमा भएका औपचारिक र अनौपचारिक छलफलबाट नेताहरू सहमति नजिक पुगेकाले सचिवालय बैठक राखिएको नेकपा स्रोतले बतायो । अध्यक्ष प्रचण्ड लगायत सदस्यहरूले प्रधानमन्त्रीबाट ओलीले राजीनामा दिनुपर्ने माग राखेपछि नेकपा भित्रको विवाद बल्झिएको थियो ।

सचिवालय बैठकमा ओली, प्रचण्ड लगायत ९ जना सदस्य उपस्थित छन् ।