रुपन्देही बुटवल शहर भएर बग्ने तिनाउ नदीमा पानीको सतह बढेपछि सर्तकता अपनाउन सूचना जारी गरिएको छ ।

पानीको सतह बढेपछि बाढी पूर्वानुमान महाशाखाले ‘अलर्ट’ जारी गरेको छ ।

सोमबार बिहानै महाशाखाले सूचना जारी गर्दै भनेको छ ‘तिनाउ नदी बुटवलको बाढी मापन केन्द्रमा जलसतह सतर्कता तह पार गरेको र बढ्दो रहेकाले कञ्चनखोला, तिनाउखोलाको तटीय क्षेत्र र कन्चनखोला आसपासका साना खोलामा बाढी आउन सक्छ, बिहान १० बजेसम्म सतर्क रहौं ।’ 

अहिले यो क्षेत्रमा भारी वर्षा भइरहेको छ । यस नदीको तटीय क्षेत्रमा झण्डै १२ हजार मानिसहरु बसोबास गर्छन् । सुकुम्बासीको नाममा नदीको बहाव क्षेत्र खुम्चाएर बस्ती बस्दा तिनाउ नदी साघुरिँदै गएको छ । 

सोमबारदेखि लगातार चार दिन ठूलो पानी पार्ने भन्दै जल तथा मौसम विज्ञान विभागले सतर्कता अपनाउन आग्रह गरेको छ । प्रदेश पाँचमा पनि ठूलो पानी पर्ने विभागले जनाएको छ ।

इलाका प्रहरी कार्यालय बुटवलका प्रमुख डिएसपी प्रतित  सिंह राठोरले अहिले तिनाउमा पानीको सतह खतरा नजिक आइनपुगेको लोकान्तरलाई जानकारी दिए ।