२२ असार २०८३, सोमबार
जर्मनीले रुसबाट ग्यास आयात गरिरहेको भन्दै अमेरिकाका राष्ट्रपति डोनल्ड ट्रम्पले जर्मनीबाट १२ हजार सैनिक फिर्ता बोलाउने निर्णयको प्रतिरक्षा गरेका छन् । वाशिङटनले ग्यास आयातलाई रोक्न विभिन्न प्रयास गरिरहेको छ ।
‘जर्मनीले रुसलाई ऊर्जाका लागि वर्षको अर्बौं डलर दिन्छ अनि हामीले जर्मनीलाई रुसबाट सुरक्षा दिनुपर्ने रे । के हो ताल ?’ ट्रम्पले ट्वीट गरे ।
रक्षामन्त्री मार्क एस्परले जर्मनीबाट ११ हजार ९०० अमेरिकी सैनिक निस्कने भनी जानकारी दिएको केही समयपछि नै ट्रम्पको ट्वीट आएको हो । शुरूमा ९ हजार ५०० अमेरिकी सैनिक फिर्ता बोलाउने कुरा भएको थियो ।
नाटोमा आर्थिक योगदान दिने विषयमा ट्रम्पले पहिलेदेखि किचकिच गर्र्दै आएका छन् । उक्त सैन्य गठबन्धनको खर्च बेहोर्न जर्मनीले आनाकानी गरिरहेको ट्रम्पको आरोप छ ।
‘
जर्मनी नाटोलाई २ प्रतिशत रकम तिर्न पनि आनाकानी गर्छ । त्यसैले हामी जर्मनीबाट सैनिक फिर्ता बोलाउँदैछौं,’ ट्रम्पले थपे ।
बुधवार जारी गरेको वक्तव्यमा एस्परले ६४ सय जति अमेरिकी सैनिकहरू अमेरिका फर्किने र ५६ सय जति अन्य युरोपेली मुलुकहरूमा तैनाथ गरिने बताए ।
त्यति गर्दा पनि जर्मनीमा २४ हजार अमेरिकी सैनिकहरू रहनेछन् ।
ट्रम्पविरोधीहरूले यसरी सैनिक हटाएर ७५ वर्षको साझेदारीलाई विना कारण भत्काइएको बताएका छन् ।
