उदयपुरको वेलाका नगरपालिकाकी उपमेयर राजकुमारी चौधरीले मेयरले भ्रष्टाचार गरेको भन्दै सामाजिक सञ्जाल फेसबूकमा लेखेपछि शुरू भएको तनावले आइतवार झडप निम्त्याएको छ ।

गत साउन ७ गते उनले फेसबूकमा 'उपमेयर पद पार्टीलाई हस्तान्तरण गर्न चाहन्छु, जनतासँग माफी माग्न चाहन्छु, कालो कर्तुतहरूको विषयमा कार्यान्वयन हुँदैन, धिक्कार छ दुई तिहाइको सरकार' भन्दै स्ट्याटस लेखेकी थिइन् ।

उनले भ्रष्टाचार हुनुमा मेयर दोषी रहेको भन्दै त्यसपछि पनि बारम्बार मेयर दुर्गाकुमार थापालाई आरोपित गरिरहिन् । साउन ७ गते नै नगरपालिकाको नियमित बैठक बसेको थियो । बैठकमा उनले नगरपालिकामा कार्यरत सहायक कम्प्युटर अपरेटरलाई भ्रष्टाचार गरेको आरोप लगाइन र मेयरले ढाकछोप गरेको बताइन् ।

मेयरले छानबिनका लागि मोहन घिमिरे, देवेश्वरप्रसाद चौधरी र जयकुमार राई सहभागी एक समिति पनि गठन गरिसकिएको जानकारी दिए ।

'७ गते बैठकमा आवेशमा आएपछि उहाँले फेसबुक स्ट्याटस लेख्नुभयो,' मेयर थापाले लोकान्तरलाई भने, '९ गते फेरि अर्को बैठकमा आएर उहाँले आत्मालोचना गर्नुभयो । म आवेशमा आएर त्यस्तो लेखें भन्दै उहाँले आत्मालोचना गरिसकेपछि अन्य दलहरू आन्दोलनमा उत्रिए । भ्रष्टाचारीलाई कारवाही हुनुपर्ने भनिरहेका छन् । समिति बनेको छ । भ्रष्टाचार भएकै हो भने पनि सहायक कम्प्युटर अधिकृतले के गर्यो होला र ? न कुनै निर्णय गर्न पाउने हो, न कहीं हस्ताक्षर ।'

आइतवार नेपाली कांग्रेस, जनता समाजवादी पार्टी, राष्ट्रिय प्रजातन्त्र पार्टीका कार्यकर्ताहरू उपमेयरकै कार्यकक्षमा ताला लगाउन आएका थिए । मेयर र उपमेयर दुवै नेकपाबाट निर्वाचित हुन् ।

मेयर थापाले भने, 'केही नेकपाकै कार्यकर्ताहरू पनि प्रदर्शनमा आएका रहेछन् । मैले उनीहरूलाई सम्झाएको छु । अहिले म बाहिर छु तर नगरपालिकाको कार्यालयमा हो-हल्ला भएको सुनेको छु ।'

थापाले यदि भ्रष्टाचार भएकै हो भने विधि र प्रक्रिया अन्तर्गत जसले भ्रष्टाचार गरेको हो उसलाई जेलसमेत लैजान आफू प्रतिबद्ध भएको बताए । यसबारेमा उपमेयर चौधरीसँग कुरा गर्न खोज्दा सम्पर्क हुन सकेन ।