उत्तर कोरियाको सरकारी सञ्चार माध्यमले पहिलो पटक नाम लिएर चीनको आलोचना गरेको छ । आलोचनामा भनिएको छ, चीन उसको संयमतालाई परीक्षा नलिओस् । अर्को एक समाचारमा अमेरिकालाई पनि चेतावनी दिइएको छ ।
केसीएनए अर्थात कोरियन सेन्ट्रल न्यूज एजेन्सी (सरकारी संस्था) ले तीन मेमा चीनको सञ्चार माध्यममाथि परमाणु खतराको विषयलाई बढाई चढाई प्रचार गरेको आरोप लगाएको थियो ।
फेब्रुअरीमा पनि केसीएनएले चीनको आलोचना गरेको थियो । तर उक्त समाचार मा भने चीनको नाम नलिइकन उसले अमेरिकाको तालमा नाचेको आरोप लगाएको थियो । क्षेत्रीय मिडियामा पनि उत्तर कोरियाई मिडियाको भनाइको समर्थनमा आएका छन् ।
दक्षिण कोरियाको यूनिफिकेशन मन्त्रालयले भनेको छ कि यस अघि उत्तर कोरिया चीनको आलोचना गर्दा छिमेकी देश शव्दको मात्र प्रयोग गथ्र्यो तर यसपटक उसले सिधै चीनको नाम लिएको छ ।
उता चीनको सरकारी सञ्चारमाध्यम ग्लोबल टाइम्सले यदी उत्तरले थप परमाणु परीक्षण गरेको खण्डमा चीनले यस्तो कदम उठाउनु पर्छ जुन यसअघि चीनले कहिल्यै उठाएको थिएन भन्दै लेख लेखेको छ ।
चीनलाई उत्तर कोरियाको समर्थक मानिदै आइएको छ । तर जबदेखी चीनले परमाणु तथा मिसाइल कार्यक्रमलाई लिएर उत्तर कोरियामाथि आर्थिक दबाब बनाउन शुरु गरेको छ जसका कारण यी दुई देशको सम्बन्धमा समस्या आएको छ ।
यसैबीच उत्तर कोरियाको पत्रिका मिन्जू जोसोनले अमेरिकालाई चेतावनी दिदै सत्ता परिवर्तनको कोशिश नगर्न भनेको छ ।
‘ट्रम्प प्रशासनले उत्तर कोरियामा नेतृत्व परिवर्तनका लागि आफ्नो सैन्य नीतिलाई मुख्य योजना बनाएको र यसलाई हासिल गर्ने कोशिश गरिरहेको छ’ पत्रिकामा भनिएको छ ।
उता दक्षिण कोरियाको योनहैप न्यूज एजेन्सीले अमेरिकी वेभसाइटको २८ वर्थलाई उदृत गर्दै उत्तरु कोरियाको परमाणु टेस्टका लागि काम भइरहेको जनाएको छ ।
