काठमाडौं, २१ वैशाख–सभामुख ओनसरी घर्तीले प्रधानन्यायाधीश सुशीला कार्कीविरुद्धको महाअभियोग प्रस्ताव दर्तामा किर्ते हस्तारक्षर प्रयोग भएकोबारे कसैले निवेदन नदिएको बताएकी छिन् ।
सामाजिक सञ्जालमा आफूलाई धेरैले महाअभियोगमा किर्ते हस्ताक्षर बारे सोधेको भन्दै सभामुख घर्तीले जवाफ दिएकी छिन् ।
ट्वीटरमा समामुख घर्ती लेख्छिन्,‘महाअभियोगका लागि किर्ते हस्ताक्षर गरियो भन्दै धेरैले मलाई मेन्सन गर्नुभयो तर अहिलेसम्म एकजना माननीयज्यूले पनि मलाई निवेदन गर्नुभएको छैन ।’
आइतबार नेपाली कांग्रेस र माओवादी केन्द्रका २४९ सांसदले हस्ताक्षर गर्दै प्रधानन्यायधीश सुशीला कार्की विरुद्ध संसद सचिवालयमा महाअभियोग दर्ता गराएका थिए ।
तर, हस्ताक्षरकर्ता मध्ये केही नेताले आफूहरुले उक्त प्रस्तावमा हस्ताक्षर नगरेको र किर्ते हस्ताक्षर गरेको सञ्चारमाध्यमहरुलाई जनाएका समाचारहरु सार्वजनिक भएपछि महाअभियोग दर्ताका लागि सांसदहरुको किर्ते हस्ताक्षर गरिएको भन्दै सामाजिक सञ्जालहरुमा विरोध भएको थियो ।
तर, सभामुखले किर्ते भयो भन्ने सांसदहरुबाट केही जानकारी वा छानविनका लागि निवेदन पेश नभएको आशयको ट्वीट गरेकी छिन् ।
आजको संसद बैठकको कार्यसूचीमा महाअभियोग राख्ने की नराख्ने भन्ने विवाद मिल्न नसक्दा संसद बैठक बस्न सकेन । कार्की विरुद्ध संसदमा दर्ता भएको महाअभियोगविरुद्ध नेकपा एमालेसहित ११ दल एक भएका छन् ।
एमाले नेतृत्वको मोर्चासहित राप्रपा, विजयकुमार गच्छादारको फोरम लोकतान्त्रिक र उपेन्द्र यादव नेतृत्वको संघीय समाजवादी फोरम विपक्षमा उत्रिएका हुन् ।
