कम्पनी दर्ता नगरी सञ्चालनमा आएको त्रिपुरेश्वरको ए.के. सर्जिकल प्रालि कारबाहीमा परेको छ । 

बिहीवार वाणिज्य, आपूर्ति तथा उपभोक्ता संरक्षण विभागको निरीक्षक अधिकृत बाबुराम अधिकृतसहितको टोलीले गरेको बजार अनुगमनका क्रममा दर्ता नगरी सञ्चालन गरेको पाइएकाले कारबाही गरिएको विभागले जनाएको छ । 
विभागका अनुसार, सो कम्पनीलाई ५० हजार रुपैयाँ जरिवाना गरिएको छ । 

‘उपभोक्ता संरक्षण ऐन, २०७५ को दफा २०(२) बमोजिम व्यवसाय दर्ता नगरी व्यवसाय सञ्चालन गरेकाले दफा २८(ट) बमोजिमको कसुरमा सोही ऐनको दफा ३९(१)(घ) अनुसार रु ५० हजार जरिवाना गरियो,’ विभागले भनेको छ । 
यस्तै विभागले अन्य ३ कम्पनीलाई अवस्था सुधार गर्नका लागि निर्देशन दिएको छ । 

इन्टरनेशनल प्याथो साइन्टिफक ट्रेडर्स न्यू लाईफ सर्जिकल तथा विकास सर्जिकल कन्सन प्रालिलाई सामान्य कैफियत भेटिएकाले तत्कालै सुधार गर्न निर्देशन दिएको विभागले जनाएको छ ।