२४ जेठ २०८३, आइतबार
गुल्मीको धुर्कोट गाउँपालिकाले किसानले उत्पादन गरेका कृषिजन्य सामग्रीको उत्पादन खरिद गरी बिक्री गरिदिने भएको छ ।
गाउँपालिका र आर्थिक समृद्धिका लागि ग्रामीण कृषि उद्यमशीलता बुटवलबीच सहमति भएपछि किसानका उत्पादनलाई गाउँपालिकाले खरिद गरिदिने भएको हो ।
गाउँपालिकाभित्रका विभिन्न १० प्रकारका कृषि सामग्रीको गाउँपालिकाले मूल्य नै तोकेर किसानलाई सम्बन्धित ठाउँमा आफ्ना सामग्री संकलन गर्न आग्रह गरेको गाउँपालिका अध्यक्ष भुपाल पोखरेलले बताए ।
महिला समूहले बनाएका मासको दाल र सेतो कर्कलोबाट निर्माण गरिएको मस्यौरा प्रतिकिलो ३८० रुपैयाँमा खरिद गरिदिने भएको छ । मूलाको सिन्की (गुन्द्रुक) प्रतिकिलो ४०० रुपैयाँ मूला सुकाएको चाना प्रतिकिलो ६० रुपैयाँ, बेसार सुकाएको चाना प्रतिकिलो २८५ रुपैयाँ, कोदो प्रतिकेजी ३७ रुपैयाँमा खरिद गरिदिने गाउँपालिकाले जनाएको छ ।
बोडी प्रतिकिलो १५० रुपैयाँ, ग्रेडिङ गरेको मकै ४० रुपैयाँ, खैरो भटमास र सेतो भटमासका लागि ७०/७० रुपैयाँ तथा खैरो गहतका लागि ९० रुपैयाँ गाउँपालिकाले मूल्य तोकेको छ । संकलन गरिएका सामग्री सम्झौता गरेको संस्थाले बुटवल लैजाने सहमति भएको गाउँपालिकाका प्रमुख प्रशासकीय अधिकृत काशीराम पन्थीले जानकारी दिए ।
