चीनको हाङ्चो शहरमा रहेको चियानताङ नदी नजिकको व्यस्त सडकमा ठूलो छाल आएपछि एक दर्जन वाहनहरू बगेका छन् । 

घटनाको भिडियो भाइरल बनिरहेको छ । छालले कारहरूको पंक्तिलाई केही सेकेन्डभित्रै निलेको देखिन्छ । 

भारी वर्षाका कारण घटना भएको हो र त्यसले सातवटा वाहनलाई क्षतिग्रस्त बनाएको छ । कोही हताहती भएको खबर छैन । 
 

टाइडल बोर नामक प्राकृतिक घटनाले विशाल छाल उत्पन्न गरेको हो । यो नदीभित्र उफान आएर त्यसको पानी घन्टौंसम्म माथि रहने स्थिति हो । 

टाइडल बोर संसारका विभिन्न स्थानमा देखापर्छन् तर चियानताङ बोर सबभन्दा विशाल हो ।

यसका छाल ३० फीटमाथिसम्म पुग्न सक्छ र ४० किलोमिटर प्रतिघन्टाको वेगमा अघि बढ्छ । 

यस नदीमा प्रत्येक शरद ऋतुमा छाल हेर्न हजारौं मानिसहरू आउने गरेका छन् । नाटकीय दृश्यको झल्को पाइन्छ कि भनी उनीहरू त्यहाँ ओइरिने गरेका हुन् ।