अमेरिकाका राष्ट्रपति डोनल्ड ट्रम्पले पुनः चुनाव जित्नका लागि दक्षिण चीन सागरमा रहेका चिनियाँ टापुहरूमा ड्रोनमार्फत क्षेप्यास्त्र प्रहार गर्न सक्ने ग्लोबल टाइम्सका सम्पादक हु सिजिनले लेखेका छन् । 

चिनियाँ सेनाले यसको कठोर जवाफ फर्काउने चेतावनी पनि उनले दिए । 

हुले ट्वीट गर्दै लेखे, ‘प्राप्त सूचनाहरूका आधारमा ट्रम्पले पुनः चुनाव जित्नका लागि दक्षिण चीन सागरस्थित चिनियाँ टापुहरूमा एमक्यू–९ रीपर ड्रोनमार्फत क्षेप्यास्त्र आक्रमण गराउने जोखिम मोल्न चाहन्छ । यस्तो गरिएमा चिनियाँ जनमुक्ति सेनाले निश्चित रूपमा प्रत्याक्रमण गर्नेछ र युद्ध शुरू गर्नेहरूलाई कठोर जवाफ फर्काउनेछ ।’

ताइवानका विषयमा चीन र अमेरिकाबीचको तनाव बढ्दै गएको अवस्थामा हुको यो भनाइ आएको हो । 

एक अमेरिकी सैन्य पत्रिकाले पूर्वी एसियामा क्षेत्रीय सन्तुलन अमेरिका र ताइवानबाट हटेर चीनतर्फ गइरहेको र ताइवानको रक्षा गर्ने हो भने त्यहाँ अमेरिकी सेना तैनाथ गर्नुपर्ने भनी सुझाव दिइएको छ । 

वर्तमान शक्ति सन्तुलनलाई हेर्दा चीनले ताइवानमा अचानक आक्रमण गर्न सक्ने देखिन्छ । 

सन् १९७९ को ताइवान रिलेसन याक्टअन्तर्गत अमेरिका कानूनी रूपमा ताइवानको सहायता गर्न बाध्य छ । 

अमेरिकाले ताइवानमा सेना पठाएमा चीन र अमेरिकाबीचको सम्झौता टुट्ने र ताइवानको जनताका लागि हानिकारक हुने चिनियाँ विश्लेषकहरूको कथन छ । अमेरिकाले त्यस्तो कदम चालेमा चिनियाँ जनमुक्ति सेनाले जोडदार सैन्य कारवाही गर्ने र शक्तिको बलमा ताइवान एकीकरण गर्ने चिनियाँहरू बताइरहेका छन् ।