३० जेठ २०८३, शनिबार
सिरिया सरकारले प्रत्येक व्यक्तिले पाउने सहुलियतको रोटीको सीमा तोक्ने नियम ल्याएपछि ठूलो परिवार भएका मानिस भोकमरीको जोखिममा परेका छन् ।
हालै सरकारले जारी गरेको आदेश अनुसार दुईजना सदस्य भएको परिवारले दिनको एक प्याकेट रोटी मात्र पाउनेछन्, चारजनाको परिवारले दुई प्याकेट पाउनेछन् अनि ६ जनाको परिवारले तीन प्याकेट पाउनेछन् । सात वा त्यसभन्दा बढी सदस्य भएका परिवारका लागि चार प्याकेट रोटी उपलब्ध गराइनेछ ।
अनि राज्यले सञ्चालन गरेका रोटी पसलमा रोटी किन्न स्मार्टकार्ड प्रयोग गर्नुपर्नेछ । यसभन्दा बढी रोटी किन्नका लागि मानिसहरू कालोबजारमा भर पर्नुपर्छ । त्यहाँ एक प्याकेट रोटीको मूल्य ५०० सिरियाली पाउन्ड छ जबकि सरकारले सहुलियतमा उपलब्ध गराउने रोटीको एक प्याकेटलाई १०० पाउन्ड पर्छ ।
सिरियाको मुद्रा पाउन्डको मूल्य घट्दै गएपछि मानिसहरू खानाको जोहो गर्नका लागि बढी समय काम गर्न बाध्य भएका छन् ।
राष्ट्रपति बशर अल–असदले अहिले देशको अधिकांश भागलाई आफ्नो नियन्त्रणमा ल्याइसकेका छन् तर उनको सरकारले देश पुनर्निर्माण गर्न सकिरहेको छैन ।
मुद्रास्फीति, उच्च मूल्यवृद्धि तथा कोरोनाभाइरस महामारीको ढाकछोप लगायतका कारणले मानिसहरूमा गहिरो नकारात्मक असर पारेको छ ।
