०८ साउन २०८३, शुक्रबार
कोरोनाभाइरस (कोभिड– १९) महामारीका कारण शिथिल व्यापार व्यवसाय प्रबर्द्धनका लागि महिला उद्यमीहरूले अनलाइन व्यापारको बाटो अपनाउने भएका छन् ।
व्यापार चलायमान गराउनका लागि नेपाल चेम्बर अफ कमर्स अन्तर्गतको नेपाल महिला चेम्बर र अनलाइन व्यापारको प्लेट फर्म सोचेको डटकमबीच लिखित सम्झौता भएको हो ।
चेम्बरकी सदस्य लीमा अधिकारीले कोभिड–१९ का कारण धरासायी भएको व्यापार/व्यवसाय अनलाइन ई कमर्समार्फत् चलायमान बनाउने उद्देश्यले उक्त सम्झौता भएको जानकारी दिइन् ।
महिला चेम्बरकी सभापति उर्मिला श्रेष्ठले अनलाइनको बढ्दो प्रयोगका साथै चेम्बरमा आवद्ध महिला उद्यमीबाट उत्पादित व्यापार अभिवृद्धि गर्न एकीकृत रूपमा अनलाइन व्यापार सुरु गरिने बताइन् ।
सम्झौतापत्रमा चेम्बरकी अध्यक्ष श्रेष्ठ र सोचेको डटकमका प्रबन्ध निर्देशक कैलाश लोहनीले हस्ताक्षर गरेका छन् ।
