स्वास्थ्य तथा जनसंख्या मन्त्रालयले कोरोनाका कारण पछिल्लो २४ घण्टामा १२ जनाको मृत्यु भएको जनाएको छ ।

बिहीवार एक सूचना जारी गर्दै पछिल्लो २४ घण्टामा४ जना महिला र ८ जना पुरुषको कोरोनाका कारण मृत्यु भएको जनाएको हो ।

मृत्यु हुनेमा सुनसरीका ३९ वर्षीय पुरुष, धनुषाका ७० वर्षीय पुरुष, काठमाडौँकी ७९ वर्षीया महिला, काठमाडौँकै ५८ र ९१ वर्षीय २ पुरुष, ललितपुरकी ७३ वर्षीया महिला, भक्तपुरकी ८२ वर्षीया महिला, चितवनका ८१/८१ वर्षका दुई पुरुष र ९२ वर्षीय अर्का पुरुष, कास्कीका ८३ वर्षीय पुरुष र सुर्खेतकी ८२ वर्षीया महिला रहेका छन् ।

यससँगै नेपालमा कोरोनाका कारण मृत्यु हुनेको संख्या ५ सय ९० पुगेको छ ।

नेपालमा पछिल्लो २४ घण्टामा ३४ सय ३९ मा कोरोना संक्रमण पुष्टि भएको छ ।

पछिल्लो २४ घण्टामा १८ हजार ४ सय ७३ को पीसीआर परीक्षण गरिएको र तीमध्ये ३४ सय ३९ मा कोरोना संक्रमण देखिएको मन्त्रालयका प्रवक्ता डा. जागेश्वर गौतमले बताएका हुन् ।

यससँगै नेपालमा सक्रिय संक्रमितको संख्या २६ हजार ६ सय ८४ पुगेको छ ।

डा. गौतमले काठमाडौँ जिल्लामा २ हजार ८५, भक्तपुरमा १ सय ३५ र ललितपुरमा ३ सय २० संक्रमित फेला परेको बताए ।

पछिल्लो २४ घण्टामा संक्रमणमुक्त भएर डिस्चार्ज हुनेको संख्या २६ सय ७५ रहेको छ । नेपालमा हालसम्म ७१ हजार ३ सय ४३ संक्रमणमुक्त भएर डिस्चार्ज भइसकेका छन् ।

सरकारले दशैं तिहारमा सार्वजनिक ठाउँमा लिंगे र रोटेपिङ नहाल्न आग्रह गरेको छ ।

बिहीवार नियमित प्रेस ब्रिफिङका क्रममा स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले दशैंका कारण देशको कुनाकाप्चासम्म कोरोना संक्रमण विस्तार हुनसक्ने भन्दै चिन्ता व्यक्त गरेका छन् ।

'दशैंका बेलामा सार्वजनिक ठाउँमा लिंगे र रोटेपिङ नहालौं,' डा. गौतमले भने ।

उनले यसपालिको दशैमा मन्दिरमा पूजारी मात्र उपस्थित भएर पूरा गर्ने व्यवस्था मिलाउन सबै सरोकारवाला निकाय र संस्थाहरूसँग आग्रह गरेका छन् ।

'दशैंतिहारमा देशको कुनाकाप्चामा संक्रमण फैलिने खतरा छ,' उनले भने, 'सबै ठाउँमा स्वास्थ्य सेवा पहुँच नभएको अवस्थामा परिस्थिति झन् गाह्रो हुन सक्छ । त्यस्तो ठाउँमा संक्रमण व्यवस्थापनको चुनौती छ । त्यसैले सबै तह र तप्काका व्यक्ति र संस्थालाई यसको व्यवस्थापनमा सरिक हुन आग्रह गर्दछौं ।