२२ असार २०८३, सोमबार
रुसका राष्ट्रपति भ्लादिमिर पुटिनकी प्रेमिका भनिएकी अलिना काबाएभा सन् २०१८ देखि सार्वजनिक रूपमा देखिएकी छैनन् ।
पोहोर साल जुम्ल्याहा सन्तान जन्माएपछि साथीहरूसँग सम्पर्क तोडेको र गायब भएको बताइएको छ ।
काबाएभा ३७ वर्षीया ओलम्पिक स्वर्ण पदक विजेता हुन् । सन् २०१८ मा अन्तिमपटक देखिँदा उनी दुई महिनाकी गर्भवती भएको र जुम्ल्याहाहरूका पिता पुटिन भएको बताइएको छ ।
उनले मस्कोस्थित क्लिनिकमा सन् २०१९ को अप्रिल महिनामा जुम्ल्याहा केटाहरू शल्यक्रियामार्फत जन्माएको बताइन्छ । तर उनी र पुटिन दुवैले यसको पुष्टि गरेका छैनन् ।
सार्वजनिक रूपमा गायब भए पनि उनले आफ्नो टीमका अर्की खेलाडीकी आमाको चिहानमा फूल चढाउनका लागि जाने गरेको काबाएभाका एक साथीले बताएका छन् ।
सन् २००० को दशकमा काबाएभाको चर्चा चुलिएको थियो । उनी सफल रुसी खेलाडीहरूको समूहमा पर्थिन् । ल्यासान उतियाशेवा र इरिना चाशचिनासँगै उनले धेरैवटा पदक जितेकी थिइन् ।
उतियाशेवाकी आमाको चिहानमा काबाएभाले फूल चढाउने गरेकी हुन् । उनलाई काबाएभाको बारेमा सोध्दा यस्तो भनिन्, ‘कुनै व्यक्तिले समाजको आँखाबाट टाढा रही जीवन बिताउन चाहेमा उसको चाहनाको सम्मान गर्नुपर्छ ।’
कासाएभाले रिदमिक जिम्नास्टिकको इतिहासमा सबभन्दा धेरै पदक जितेकी छन् । दुईवटा ओलम्पिक पदकका साथै उनले १४ वटा वर्ल्ड च्याम्पियनशिप पदक र २५ वटा युरोपियन च्याम्पियनशिप पदक जितेकी छन् ।
खेलकुदबाट संन्यास लिएपछि काबाएभा राजनीतिमा आइन् र पुटिनको युनाइटेड रसियाको सदस्य बनिन् ।
एकपटक उनले एक पत्रिकाका लागि अर्धनग्न तस्वीर खिचाएकी थिइन् । उनी एक फिल्ममा पनि देखिएकी छन् र गायनमा पनि करीयर बनाउने कोशिश गरेकी थिइन् ।
पोहोर साल उनले जुम्ल्याहा सन्तान जन्माएको हल्ला चल्दा कुलाकोभ अस्पताल पूरै खाली गराएको कुरा पनि उठेको थियो ।
अस्पताल खाली गराएको खबर मोस्कोव्स्की कोमसोमोलेट्स नामक पत्रिकाले आफ्नो वेबसाइटमा दिएको थियो तर अचानक त्यसलाई डिलिट गरिदियो ।
मोस्कोव्स्की कोरेस्पोन्डेन्ट नामक पत्रिकाले सन् २००८ मा काबाएभा र पुटिनले इंगेजमेन्ट गरेको खबर दिएपछि त्यसको खण्डन गरिएको थियो र पत्रिका नै बन्द गराइएको थियो ।
पुटिनले आफ्नो निजी जीवनलाई अत्यन्तै गोप्य राख्ने गरेका छन् ।
