भारतको राजस्थानमा एउटा अनौठो घटना भएको छ, जहाँ चुनाव हारेपछि आयोजित धन्यवाद सभामा समर्थकले २१ लाख भारतीय रुपैयाँ अर्थात ३३ लाख नेपाली रुपैयाँभन्दा बढी रकम उठाएका छन् ।

भारतीय सञ्चारमाध्यम आजतक प्रकाशित खबर अनुसार राजस्थानको जोधपुरस्थित पीपाड नानण गाउँमा भएको पञ्चाय चुनावमा सुन्दर देवीले मक्कू देवीलाई ८४ मतले हराइन् । थोरै अन्तरले हारेपछि धन्यवाद सभा आयोजना गरियो । जसमा उनका समर्थकले चुनावी खर्च फरफारक गर्न आर्थिक सहयोग गर्ने निर्णय गरे ।

गाउँका समर्थकले मक्कू देवीका पतिको शिरमा नोटहरूले भरिएको थाली राखेर धन्यवाद सभाबाट बिदा गरेका थिए । धन्यवाद सभामै पराजित उम्मेदवारले निर्वाचित वडापञ्चहरूलाई माल्यार्पण गर्दै स्वागत गरेका थिए ।

पराजित उम्मेदवारका समर्थकले नेताको मनोबल बढाउन गरेको आर्थिक सहयोग अहिले चर्चाको विषय बनेको छ । धन्यवाद सभामा सबैका लागि खानाको व्यवस्था गरिएको थियो ।

पीपाड गाउँ पञ्चायतमा १० अक्टुबरमा निर्वाचन भएको थियो । गाउँमा मक्कू देवी, सुन्दरी देवी, प्रियंका र किरण चुनावी मैदानमा थिए । सुन्दरीले २ हजार ५१ भोट ल्याउँदा मक्कूले १ हजार ९६७ मत ल्याएकी थिइन् ।