१० साउन २०८३, आइतबार
आफ्नो अभिव्यक्तिलाई लिएर सार्वजनिक माफी माग्नुपर्ने भन्दै विज्ञप्ति निकालेपछि पूर्वप्रधानमन्त्री डा बाबुराम भट्टराईले नेकपा प्रवक्ता नारायणकाजी श्रेष्ठलाई सत्ताको तुजुक नदेखाउन चेतावनी दिएका छन् ।
बूढीगण्डकी जलविद्युत आयोजनाबाट नेकपाका अध्यक्षद्वय केपी शर्मा ओली, पुष्पकमल दाहाल प्रचण्ड र कांग्रेस सभापति शेरबहादुर देउवाले अर्बौ घुस लिएको आरोप बाबुरामले लगाएका थिए ।
प्रवक्ता श्रेष्ठले बुधवार विज्ञप्ति प्रकाशित गरी घुस लिएको कपोकल्पित आरोपबारे बाबुरामले सार्वजनिक माफी माग्नु पर्ने बताएका थिए । ‘बुढीगण्डकी, एनसेल, वाइडबडी,सुरक्षा प्रिन्टिङ,यति,ओम्नी लगायत सबै ठूला भ्रष्टाचार काण्डको छानविन र दण्डसजाय गर्न अधिकारसम्पन्न जनलोकपाल गठन गरौं। सबै उच्च पदासीनहरूको सम्पत्ति छानवीन गरौं। म पूर्ण सहयोग गर्न र दोषी ठहरे दण्डित हुन तयार छु । जस्केलाबाट छिर्नेहरूले सत्ताको तुजुक नदेखाउ,’ भट्टराईले बुधवार साझ ट्वीट गर्दै भनेका छन् ।
भट्टराईले श्रेष्ठलाई जस्केलाबाट संसद छिरेको आरोप लगाएका छन् । २०७४ सालको प्रतिनिधि सभा चुनावमा नारायणकाजी बाबुरामसँग पराजित भएका थिए । श्रेष्ठ पछि राष्ट्रिय सभामा निर्वाचित भएका थिए ।
