२२ जेठ २०८३, शुक्रबार
भारतमा गहना कम्पनी तनिष्कले बनाएको एक विज्ञापनले विवाद निम्त्याएपछि हटाइएको छ । विज्ञापनको विरोध गरिरहेकाहरूले तनिष्कलाई यस विज्ञापनका लागि माफी माग्न भनिरहेका छन् ।
मंगलवार तनिष्कले एक विज्ञप्ति जारी गर्दै यस चुनौतीपूर्ण समयमा विभिन्न क्षेत्रमा मानिस, स्थानीय समुदाय र परिवारहरूलाई एकत्रित गरी उत्सव मनाउन प्रेरित गर्ने उद्देश्यले विज्ञापन बनाइएको बतायो ।
तर यस विज्ञापनको उद्देश्यविपरीत गम्भीर प्रतिक्रिया आएको र जनताको भावनालाई आहत गरेकोमा आफूहरू दुःखी भएको उसले जनायो । उनीहरूको भावनालाई कदर गर्दै कर्मचारी र साझेदारहरूको हितलाई ध्यानमा राख्दै विज्ञापन फिर्ता लिइएको तनिष्कले जानकारी दियो ।
विज्ञापनमा मुसलमान परिवारमा हिन्दू बुहारी गर्भवती हुँदा दही खुवाउने संस्कार देखाइएको थियो ।
सेन्टर फर मिडिया स्टडीजकी महानिर्देशक पीएन वसन्ती यो एकदमै सुन्दर विज्ञापन भएको बताउँछिन् र यसमा केही गलत कुरा नदेखाइएको जिकिर गर्छिन् ।
सामाजिक सञ्जालमा यस विज्ञापनका विषयमा आएका प्रतिक्रिया लज्जास्पद भएको उनको धारणा छ । विज्ञापनविरुद्ध योजनाबद्ध रणनीति बनाइएको उनको धारणा छ ।
टाटा जस्तो ठूलो ब्रान्डले विज्ञापन किन फिर्ता लिएको होला भनी उनले आश्चर्य मानिन् ।
विज्ञापनको विरोध गर्ने खेमचन्द शर्मा सोध्छन्, ‘विज्ञापनको उद्देश्य के थियो ? यसमा सुन्दरता छ कि कुरूपता ?’
आफूहरूले टाटा ब्रान्ड, रतन टाटा वा तनिष्कलाई बदनाम गर्न नखोजेको तर विज्ञापनमा मुसलमानहरू मात्र प्रेम र सम्मान गर्छन्, हिन्दूले गर्दैनन् भनी देखाउन खोजिएकाले आपत्ति उठाएको बताए । यसमार्फत लभ जिहाद फैलाइएको उनको भनाइ छ ।
भाजपाको आईटी सेल तथा सामाजिक सञ्जाल समितिका सदस्य रहिसकेका खेमचन्द सबै धर्मको सम्मान गर्ने बताउँछन् । तर यस विज्ञापनमा क्रिएटिभ हेड मुसलमान भएको र उनले यस्तो विज्ञापन बनाउनै नहुने थियो भन्छन् ।
विज्ञापनलाई उल्टो पारेर देखाउन पनि उनी जोड दिन्छन् ।
उल्टो पार्नुमा के तुक छ ? मुसलमान परिवारका हिन्दी बुहारी हुँदा एकता नदेख्नेले उल्टो पार्दा कसरी एकता देख्नुहुन्छ त ?
यसको उत्तर दिँदै खेमचन्द शर्मा भन्छन्, ‘अभिनेत्री शबाना आजमी यस विज्ञापनमा सुन्दरता देख्छिन् । तर राहुल कोठारीको मृत्युमा उनी चुप छिन् । त्यसमा उनी कुनै गल्ती देख्दिनन् । ऊ हिन्दू युवक थियो । मुसलमान युवतीलाई प्रेम गर्थ्यो । उसलाई कुटीकुटी मारे । उसको मृत्यु भएकै दिन यो विज्ञापन ल्याइयो र यी दुईमा सम्बन्ध छ । विज्ञापनलाई उल्टो पारेर देखाउनुुस् त, शबाना आजमी र कांग्रेसका नेताहरूले यसमा सुन्दरता देख्छन् कि दैख्दैनन् थाहा भइहाल्छ ।’
विज्ञापन फिर्ता लिएको सही हो किनकि यो विज्ञापन पूर्णतया गलत थियो, उनको भनाइ छ ।
विज्ञापनहरूले जनमानसमा विशेष प्रभाव पार्छन् । एक फिल्म वा धारावाहिक एकपटक आउँछ तर विज्ञापन त आँखाअगाडि बारम्बार आउँछ । दर्शकलाई ग्राहक बनाउन र उत्पादनप्रति लोभ्याउन विज्ञापन बनाइने हो ।
विगत केही वर्षमा विज्ञापनहरूमा एक किसिमको प्रगतिशीलता देखिएको छ ।
