यो पटकको दशैं कसरी मनाउँदै हुनुहुन्छ ?

विगतमा जस्तो रमझम नगर्ने । निकै सावधानी अपनाएर दशैं मनाउने योजनामा छु ।

यो पटक दशैंमा मिस भएको कुरा के हो ?

दशैंको अर्को महत्त्वपूर्ण कुरा भनेको भेटघाट पनि हो । यसपटक धेरै आफन्त, इष्टमित्र कसैसँग पनि भेटघाट हुने छैन ।

जिन्दगीको सबैभन्दा सम्झनलायक दशैं कुन होला ?

सानो हुँदा नयाँ कपडा लगाउने र साथीभाइलाई देखाउनुको मज्जा बेग्लै थियो ।

दशैंको सबैभन्दा महत्त्वपूर्ण पक्ष के हो ?

आफूभन्दा ठूलाको आशीर्वाद, जसले गर्दा हाम्रो पारिवारिक सामाजिक सम्बन्ध निकै राम्रो र बलियो छ ।

दशैंमा सपिङ गर्ने बानी कत्तिको छ ?

आवश्यक सपिङ लगभग भइसकेको छ । केही बाँकी पनि छ, किन्नुपर्ने । तर, सपिङ गर्ने माहोल खासै राम्रो नभएकाले थोरैमा चित्त बुझाउने योजना बनाएकी छु ।

दशैंको राम्रो–नराम्रो पक्ष के–के हो ?

दशैंका सबै राम्रा पक्ष छन् । तर, दशैं मनाउने नाममा देखासिकी गर्नु, रमाइलोको नाममा अनावश्यक रूपमा पेय पदार्थ जुवातास खेलेको मलाई चित्तै बुझ्दैन ।

दशैं मनाउने तरिका परिवर्तन हुँदै गएको जस्तो लाग्छ ?

पहिला हाम्रो परम्परा संस्कृतिलाई ध्यान दिइन्थ्यो, आजकल रमाइलो मोजमस्तीतिर आकर्षित हुँदै गएको पक्का हो । जुन मलाई र शायद धेरैलाई मन पर्दैन ।

दशैंका बेला खानपानमा खासै ध्यान दिइएको पाइँदैन नि ?

आफ्नो स्वास्थ्य महत्त्वपूर्ण कुरा हो । त्यसैले प्रत्येक वर्ष आउने दशैं राम्रोसँग मनाउनका लागि खानपानमा निकै ख्याल गर्नुपर्छ ।

सानो छँदाको दशैं सम्झना कत्तिको याद गर्नुभएको छ ?

मामाघर जाने । नयाँ लुगा लगाउने । खसी काट्ने । सबैको घरमा मालश्री पञ्चेबाजा बजाउँदै गाउँ घुम्ने कुराहरू निकै अविस्मरणीय कुरा हुन् ।

दशैंका बेला सधैँ सम्झनामा आउने एउटा याद के हो ?

टीका जमरा । निधारमा छपक्कै टीका र टन्न जमरा लगाएर दशैंमा मान्यजनबाट आशीर्वाद पाउनु भनेको निकै रमाइलो लाग्थ्यो । पहिले पनि । अहिले पनि ।