२१ जेठ २०८३, बिहीबार
जिल्ला प्रशासन कार्यालय कैलालीले धनगढीका मुस्लिम समुदायलाई कब्रस्तानमै दाहसंस्कार गर्न अनुमति दिएको छ ।
जिल्ला प्रशासन कार्यालय कैलालीमा शनिवार बिहान भएको सरोकारवालाको छलफलपछि मुस्लिम समुदायलाई कब्रस्तानमा दाहसंस्कार गर्न अनुमति दिइएको हो ।
प्रशासनका अधिकारीसँगै मुस्लिम अगुवा, स्थानीय वासिन्दा र जनप्रतिनिधिबीचको सल्लाहपछि अनुमति दिइएको हो ।
स्थानीय प्रशासनले शवको अन्तिम संस्कार गर्न दिने अनुमति दिएसँगै २ दिनदेखि घरमै रहेको शवको अन्तिम संस्कार हुने भएको छ । शुक्रवार बिहान मृत्यु भएर घरमै राखिएका पुरुषको शव कब्रस्तानमै अन्तिम संस्कार गर्न लागिरहेको धनगढी उपमहानगरपालिका–१ स्थित नेपाली नूरी जामा मस्कितका कार्यबाहक अध्यक्ष महोमद यामिनले जानकारी दिए ।
धनगढी उपमहानगरपालिका–१ वडा कार्यालयले कब्रस्तान नै सिल गरेपछि २ दिनदेखि १ जना मृतकको अन्तिम संस्कार हुन सकेको थिएन ।
शुक्रवार बिहान दुवै मिर्गौला फेल भएर धनगढी उपमहानगरपालिका–१ का ५० वर्षीय मोहम्मद जमसेदको मृत्यु भएको थियो । तर शवको कब्रस्तानमा दाहसंस्कार गर्न नदिइएपछि घरमै शव राखेर मृतकका परिवार तथा आफन्तजन शुक्रवार बिहानदेखि शनिवार दिउँसोसम्म जिल्ला प्रशासन कार्यालय धाउन बाध्य भएका थिए ।
अब शवको दाह संस्कारको काम अगाडि बढेको छ । मुस्लिम धर्म अनुसार उनको दाह संस्कारको तयारी भइरहेको परिवारजनले जनाएको छ ।
