मुसीकोट नगरपालिका–२ का रमेश केसीले गत वर्ष भैंसी पालनबाट २४ हजार रुपैयाँ अतिरिक्त आम्दानी गरे ।

४ नम्बर वडाका राजु ओलीको १९ हजार थप आम्दानी हुँदा १३ नम्बर वडाका नारायण खड्काले पनि १७ हजार कमाए ।

उनीहरू मात्र होइन, नगरपालिकाका दूध उत्पादक किसानले अतिरिक्त कमाइ गरिरहेका छन् । नगरपालिकाले व्यावसायिक किसानलाई प्रतिलिटर ३ रुपैयाँ अनुदान दिन थालेपछि उनीहरूले अतिरिक्त आम्दानी गरिरहेका हुन् । गत आर्थिक वर्षमा सुरु भएको कार्यक्रम ६ महिना मात्र चले पनि यस वर्ष निरन्तरता दिइएको छ ।

गत वर्ष १५ जना किसानले यो अनुदान पाए । नगरपालिकाले अनुदान कार्यक्रम ल्याएपछि हौसला बढेको केसीले बताए । ‘भैंसी किन्न र भकारो सुधारमा पनि अनुदान पाइरहेका छौं,’ उनले भने, ‘दूधमा पनि अनुदान दिएपछि थप व्यावसायिक बन्न सहयोग पुगेको छ ।’

अहिलेसम्म १ लाख १५ हजार रुपैयाँ अनुदानबापत किसानलाई वितरण गरिएको नगरप्रमुख देवीलाल गौतमले जानकारी दिए । ‘व्यक्तिगत तथा सामूहिक रूपमा दूध उत्पादनमा लागेका कृषकलाई यो सुविधा दिएका छौं,’ उनले भने, ‘कार्यक्रमले किसानलाई थप व्यावसायिक बन्न सहयोग गरेको छ ।’ नगरपालिकाका अनुसार अनुदान पाउनका लागि किसानले एक वर्षमा कम्तीमा ५ सय लिटर दूध सूचीकृत डेरीमा बिक्री गरेको हुनुपर्छ ।

यो वर्ष नगरपालिकाले भैंसी प्रवर्द्धन कार्यक्रमका लागि २१ लाख ८० हजार रुपैयाँ विनियोजन गरेको छ । कान्तिपुर दैनिकमा खबर छ ।