अमेरिकाको भावी राष्ट्रपति को बन्ला भनी अझैसम्म पनि टुंगो लाग्न सकेको छैन । तर जर्जिया, एरिजोना र पेन्सिल्भेनिया जस्ता महत्त्वपूर्ण राज्यमा प्रतिस्पर्धा झन् झन् कडा हुँदै गएको छ । 

यी राज्यहरूमा मतपत्र गन्ने काम जारी छ । निर्वाचन अधिकारीहरूले भरेतिर मात्र अप्डेट दिनेछन् । 
 

बाइडनले मिशिगन र विस्कोन्सिन जस्ता महत्त्वपूर्ण राज्य जितेका छन् । ती राज्यमा परम्परागत रूपमा डेमोक्रेटकहरूको पकड थियो तर सन् २०१६ को निर्वाचनमा डोनल्ड ट्रम्पले डेमोक्रेटहरूबाट त्यसलाई हत्याएका थिए । अहिले ती फेरि डेमोक्रेटकहाँ पुगेका छन् । 
 

नेभादामा पनि मतगणना जारी छ । त्यहाँका निर्वाचन अधिकारीहरूले बुधवार एकदमै कम सूचना उपलब्ध गराएका थिए र पछिल्लो परिणाम बिहीवार मध्यरातसम्म आउन सक्नेछ । 

अहिलेको स्थितिमा ७५ प्रतिशत मत गनिएको छ र बाइडनले ४९.३ प्रतिशत मत पाएका छन् । ट्रम्प ४८.७ प्रतिशतका साथ पछिपछि छन् ।

यसबीच महत्त्वपूर्ण राज्य पेन्सिल्भेनियामा हुलाकबाट प्राप्त मतपत्र तथा एब्सेन्टी भोटहरू धमाधम गन्ने काम भइरहेको छ । त्यहाँ ट्रम्पले अग्रता लिइरहेको भए पनि हुलाकको मतपत्र गन्दा बाइडनले ट्रम्पलाई उछिन्न सक्ने देखिएको छ । हुलाकमार्फत आएका यस्ता मतपत्र डेमोक्रेटहरूको बाहुल्य रहेको फिलाडेल्फियाबाट आएको हो । 
 

पेन्सिल्भेनियामा ताजा अवस्थामा ८९ प्रतिशत मतगणना भइसकेको छ र ट्रम्पको ५०.७ प्रतिशत मत देखिएको छ भने बाइडनको ४८.१ प्रतिशत मत देखिएको छ ।

उता जर्जियामा पनि प्रतिस्पर्धा कडा हुँदै गएको छ । ट्रम्पले त्यहाँ अग्रता गुमाउँदै गएका छन् । अहिलेसम्म ९८ प्रतिशत मतको गणना भइसक्दा ट्रम्पको ४९.६ प्रतिशत छ भने बाइडनको ४९.२ प्रतिशत मत छ ।
 

एरिजोना राज्यको मतगणनाले अनौठो परिणाम ल्याइरहेको छ । त्यहाँ हिजै एसोसिएटेड प्रेस र फक्स न्युजले बाइडन विजयी हुने भविष्यवाणी गरेका थिए तर हुलाकबाट प्राप्त मतपत्र र एब्सेन्टी ब्यालोट गन्दा ट्रम्पले बाइडनलाई कडा टक्कर दिइरहेको देखिएको छ । 
 

मारिकोपा काउन्टीमा बाइडनको अग्रता घटेको देखिएको छ । तर अझै लगभग पाँच लाख मतपत्र गन्न बाँकी रहेकाले त्यहाँको अन्तिम परिणाम आउन केही दिन लाग्ने देखिएको छ । 
 

एसोसिएटेड प्रेसको प्रक्षेपणअनुसार, बाइडनले २६४ इलेक्टोरल भोट ल्याइसकेका छन् भने ट्रम्पले २१४ मत पाएका छन् । विजयी हुनका लागि २७० भोट ल्याउनुपर्ने हुन्छ । 

ट्रम्प पक्षधरले मतगणना रोक्नका लागि अदालतमा मुद्दा दायर गरेको छ र बाइडन पक्ष पनि कानूनी लडाइँका लागि तयार छ । त्यसैले अमेरिकाको भावी राष्ट्रपतिको टुंगो लाग्न अझै केही दिन वा हप्ता लाग्न सक्ने देखिएको छ ।