तनहुँको व्यास नगरपालिका–५ मानहुँकोटमा एक्कासी आन्तरिक पर्यटकको घुइँचो बढेपछि सम्भावित जोखिम न्यूनीकरणका लागि दैनिक ३०० जनालाई मात्र प्रवेश दिइने भएको छ ।

नगरपालिकाको बैठकले पर्यटकीयस्थल मानहुँकोटमा अब दैनिक ३०० पर्यटकलाई मात्र प्रवेश अनुमति दिने गरी दर्ता प्रणाली शुरू गर्ने निर्णय गरेको वडाध्यक्ष मोहनकुमार श्रेष्ठले जानकारी दिए । बैठकले सो क्षेत्रमा पुस मसान्तसम्म जग्गा किनबेचमा रोक लगाउने निर्णय समेत गरेको छ ।

विश्वभर महामारीको रूपमा फैलिएको कोराना भाइरस (कोभिड–१९) संक्रमणको जोखिम बढेको र अन्य सम्भावित दुर्घटना निम्तिन सक्ने भन्दै नगर प्रमुख बैकुण्ठ न्यौपानेको अध्यक्षतामा बसेको बैठकले संख्या निर्धारण गरेको हो ।

पछिल्लो समय पर्यटकको चहलपहल भएपछि जग्गा व्यवसायीको आँखा मानहुँकोटमा पुगेको र जग्गा किन्नेक्रम बढेकोले अबको २ महिनासम्म किनबेचमा रोक लगाएको छ ।

सो ठाउँमा गुरुयोजना बनाएर मानहुँकोटको विकासका लागि तत्काल शौचालय निर्माण, खानेपानी र सुरक्षाको व्यवस्थापन समेत गरिने भएको छ । बैठकले १ महिनाभित्र मानहुँकोटको गुरुयोजना तयार पार्ने, खानेपानीको लागि डीपीआर गर्ने, सार्वजनिक जग्गा पहिचान गरी संरक्षण गर्ने निर्णय समेत गरेको छ । सार्वजनिक शौचालय निर्माणकै लागि २५ लाख निकासा गरिने बताइएको छ ।

अचेल दैनिक करीब १० हजार मानिस मानहुँकोट उक्लिने गरेका थिए । सबैलाई आश्चर्य पार्दै शनिवार मात्रै एकै दिनमा झण्डै १५ हजार मानिस त्यहाँ पुगेका थिए ।

सूर्योदय र चारैतिर कुहिरोले ढाकेको मनमोहक दृश्यले मानहुँकोट पर्यटकको आकर्षणको केन्द्र बनेको हो । त्यहाँ घुम्नेहरूले सामाजिक सञ्जालमा फोटो शेयर गरेपछि मानहुँकोट लोकप्रिय बनेको छ ।