२२ जेठ २०८३, शुक्रबार
पूर्वकै प्रमुख व्यापारिक केन्द्रको रूपमा विकास हुँदै गएको झापाको बिर्तामोड नगरपालिकाले कृषि क्षेत्रको विकासलाई प्राथमिकता दिएको छ । त्यसमा पनि अर्ग्यानिक कृषि उत्पादनलाई विशेष जोड दिएको छ ।
कृषि उत्पादनलाई प्राथमिकता दिएकै कारण बिर्तामोड नगरपालिका अहिले कृषि उत्पादनका हिसाबले आत्मनिर्भर बन्दै गएको छ ।
नगरपालिकाका कृषि शाखा अधिकृत राजेन्द्र कडरिया कृषि क्षेत्रमा उल्लेख्यमा लगानी गरेकै कारण नगर अहिले तरकारी र खाद्यान्नमा आत्मनिर्भर हुने अवस्थामा पुगेको बताउँछन् ।
स्थानीय तह पुनःसंरचनापछि बनेको बिर्तामोड नगर सरकारले पहिलो आर्थिक वर्ष २०७४/७५ मै कूल बजेटको ७.४७ अर्थात् १ करोड ७५ लाख बजेट कृषि क्षेत्रको विकासका लागि छुट्याएको थियो । आव २०७५/७६ मा १ करोड ८० लाख, आव २०७६/७७ मा १ करोड ९० लाख र चालू आर्थिक वर्ष २०७७/७८ मा १ करोड ८० लाख बजेट विनियोजन गरिएको छ ।
चालू आर्थिक वर्षसहित स्थानीय सरकार सञ्चालनको ४ वर्षे अवधिमा नगरको कूल बजेट ३ अर्ब ६ करोड ८४ लाख ८० हजार छ । जसको २.३६ प्रतिशत अर्थात् ७ करोड २५ लाख नगरपालिकाले कृषि क्षेत्रको विकासका लागि विनियोजन गरेको देखिन्छ । बिर्तामोड नगरपालिकाका नगर प्रमुख ध्रुवकुमार शिवाकोटीले स्थानीय तह निर्वाचनताका नै अर्ग्यानिक कृषि उत्पादनलाई विशेष प्राथमिकतामा राख्ने प्रतिबद्धता जनाउँदै आएका थिए । आफ्नो चुनावी एजेण्डालाई स्थापित गर्न र नगरवासीको दैनिकीसँग जोडिएको महत्त्वपूर्ण पाटो कृषिलाई प्रवद्र्धन गर्न विभिन्न योजना उनले ल्याएका छन् । जसको परिणाम अहिले नगरपालिका कृषिमा आत्मनिर्भर हुँदै गएको हो ।
नगर क्षेत्रमा हुने अधिकांश कार्यक्रममा नगर प्रमुख शिवाकोटी अग्र्यानिक कृषिका विषयमा जोड दिन्छन् । अर्ग्यानिक कृषि उत्पादनलाई प्रोत्साहन गर्नकै लागि नगरपालिकाले मेयर विषादीमुक्त नगर कार्यक्रमसमेत सञ्चालनमा ल्याएको छ । – सन्तोष शर्मा/रासस
