१९ असार २०८३, शुक्रबार
प्रधानमन्त्री एवं नेकपा अध्यक्ष केपी शर्मा ओलीले कार्यकारी अध्यक्ष पुष्पकमल दाहाल ‘प्रचण्ड’ले लगाएका आरोप अस्वीकार गर्दै पार्टीमा विग्रह निम्त्याउने प्रस्ताव सचिवालय बैठकबाट खारेज गर्न प्रस्ताव गरेका छन् ।
ओलीले पार्टीलाई २०७७ भदौ २६ गते स्थायी कमिटीले निर्माण गरेको सहज अवस्थामा फर्काउन पनि आग्रह गरेका छन् ।
प्रधानमन्त्री निवास बालुवाटारमा शनिवार बसेको सचिवालय बैठकमा प्रस्ताव पेश गर्दै ओलीले देश र जनताको समस्या समाधान गर्न सक्ने पार्टी बनाएर आफूले अवकाश लिन चाहेको उल्लेख गरेका हुन् ।
‘म कमरेडहरूलाई आग्रह गर्न चाहन्छु, पार्टीमा विग्रह निम्त्याउने कथित प्रस्ताव सचिवालय बैठकबाट खारेज गरौं र पार्टीलाई २०७७ भदौ २६ गते स्थायी कमिटीले निर्माण गरेको सहज अवस्थामा फर्काऔं,’ ओलीले पेश गरेको प्रस्तावमा भनिएको छ, ‘म आश्वस्त पार्न चाहन्छु – म विचारमा, संगठनमा, आचरणमा र आदर्शमा कुनै विचलन आउन दिन्नँ ।’ ओलीले सबैलाई कम्युनिस्ट हुनुको गौरवबोध गर्ने, ठाडो शिर लगाएर रातो झण्डा बोकेर हिँड्ने अवस्था सिर्जना गर्ने इच्छा रहेको प्रतिवेदनमा उल्लेख गरेका छन् ।
अध्यक्ष ओली र अर्का अध्यक्ष प्रचण्डको प्रस्तावमाथि मंसिर १६ गते मंगलवारदेखि छलफल हुने प्रवक्ता नारायणकाजी श्रेष्ठले जानकारी दिए । अध्यक्ष प्रचण्डले कात्तिक २८ गते सचिवालय बैठकमा ओलीमाथि आरोप बर्साउँदै राजनीतिक प्रस्ताव पेश गरेका थिए ।
शनिवार सचिवालय बैठकमा पेश गरेको जवाफमा ओलीले अहिलेका अन्तरिम कमिटीलाई अल्पमत बहुमतको खेल खेल्ने थलो नबनाउन आग्रह गरेका छन् । ‘मेरो आग्रह छ, कुनै पनि महाधिवेशन/अधिवेशनहरुबाट निर्वाचित नभएका, महाधिवेशनसम्मको संक्रमणकालीन व्यवस्थाका लागि भनेर बनाइएका र सहजतापूर्वक महाधिवेशन आयोजना गरी नेतृत्व हस्तान्तरण गर्ने मुख्य अभिभारा भएका अन्तरिम कमिटीहरुलाई अल्पमत र बहुमतको खेल खेल्ने थलो नबनाऔं,’ ओलीले भनेका छन् ।
ओलीले पार्टीमा अहिले भइरहेको विवाद नीतिगत बहस हो कि वार पारको लडाइँ भनेर प्रश्न गरेका छन् । ‘कमरेड ‘प्रचण्ड’, शुरूमै तपाईँलाई मेरो प्रश्न छ – पार्टीभित्र चलिरहेको यस बहसको चरित्र के हो ? यो स्वस्थ नीतिगत बहस हो कि ‘वार कि पार’को लडाइँ ? यो अन्तरविरोध नै हो भने पनि यो मित्रतापूर्ण हो कि शत्रुतापूर्ण ? तपाईंले रोजेको बाटो वाद–प्रतिवाद–संवादको हो कि वाद–प्रतिवाद र विग्रहको ?’ ओलीले चौथो नम्बर बुँदामा प्रचण्डसँग प्रश्न गरेका छन् ।
आफूले आलोपालो प्रधानमन्त्रीको प्रस्ताव त्याग गरेको भन्ने प्रचण्डको दावीलाई ओलीले सत्तालिप्साको संज्ञा दिएका छन् । ‘चुनावबाट तेस्रो पार्टीका रूपमा आएको पार्टीका अध्यक्षले ‘मैले प्रधानमन्त्री बन्न प्राप्त अवसर लत्याएँ’ भन्नु त्याग थियो कि तपाईंभित्र सुषुप्त रूपमा लुकेको सत्तालिप्सा ? जे होस्, हामीले नयाँ समझदारी गर्यौं, म प्रधानमन्त्री बनें । यो एकतर्फी त्याग थिएन भन्ने तपाईंले हेक्का राख्नु राम्रो हुन्छ,’ ओलीले जवाफमा भनेका छन् ।
५३ बुँदामा समेटिएको ओलीको प्रतिवेदन मुख्यतः प्रचण्डले लगाएका आरोपको खण्डनमै केन्द्रित देखिन्छ । ओली र प्रचण्डको प्रस्तावमाथि सचिवालयमा मंसिर १६ गते छलफल हुँदैछ ।
