०७ असार २०८३, आइतबार
अमेरिकी प्रहरीलाई विश्वकै प्रभावकारी मानिन्छ । अझै एफबीआई त विश्वकै एक नम्बर खुफिया एजेन्सी मानिन्छ । हालै अमेरिकामा एक सिरियल किलरको कहानीले एफबीआईलाई नै निरन्तर ३५ वर्षसम्म मात खुवाएको पुष्टि हुन्छ ।
सेमुअल लिटिन नामका ७८ वर्षीय ती हत्याराले ३५ वर्षसम्म ९० भन्दा बढी महिलाको हत्या गरेका छन् । सन् २०१२ मा पक्राउ परेका हुन् १९७० देखि २००५ सम्म आफूले ९० भन्दा बढी महिलाको हतया गरेको स्वीकारेका छन् । अमेरिकी अदालतले उनलाई अहिले तीन वर्षको सजाय सुनाएको छ । यसअघि तीन पटक उनलाई जन्मकैदको सजाय पनि सुनाइसकेको थियो ।
उनले स्वीकारेको हत्या आरोप पुष्टि भयो भने अमेरिकी इतिहासमै सबैभन्दा बढी व्यक्तिको हत्या गर्ने हत्याराको सूचीमा सेमुअल पर्नेछन् । उनको यो बयानले अमेरिकी प्रहरी र एफबीआईलाई अचम्मित बनाएको छ ।
साथै विश्वको नम्बर एक दाबी गर्ने एफबीआईलाई ३५ वर्षसम्म ९० जनाको हत्यापछि पनि मात खुवाउने सेमुअल पहिलो व्यक्ति नै बन्नेछन् ।
३५ वर्षमा ९० हत्या
सेमुअलले ३५ वर्षको अवधिमा ९० हत्या गरेको स्वीकारेका छन् । यसमा ३४ हत्याको पहिले नै पुष्टि भइसकेको छ ।
सेप्टेम्बर २०१२ मा सेमुअललाई गिरफ्तार गरिएको थियो । पक्राउपछि उनलाई क्यालिफोर्निया लगिएको थियो । उनलाई पहिला तीन महिलाको हत्या आरोपमा पक्राउ गरिएको थियो ।
लस एन्जेलिस प्रशासनले १९८७ देखि १९८९ बीच भएको तीन महिलाको हत्या आरोपमा पुष्टि गर्न समेुअलको डीएनलाई मिलान गराएको थियो । डीएनए मिलेपछि उनले एक एक गर्दै आफ्नो हत्याबारे कहानी बताएका हुन् ।
यी तीन महिलालाई पहिला कुटपिट गरिएको थियो । त्यसपछि घाँटी च्यापेर हत्या गरी शवलाई गाडिएको थियो । सेमुअललाई यी तीन महिलाको हत्यामा सजाय सुनाइएको थियो ।
अहिले उनको बयानपछि प्रहरीले एफबीआईमार्फत उक्त डीएनए मागेको छ । अरु हत्यामा पनि जानकारी लिनका लागि एफबीआईसँग डीएनए माग गरिएको हो ।
अचम्मको कुरा त के छ भने, सेमुअल जुन व्यक्तिको हत्या गर्दथे उनीहरु सबै यादमा रहेको बताएका छन् । यतिमात्रै नभइ हत्या भएका सबैको अनुहारसमेत याद रहेको एफबीआईसमक्ष आफ्नो बयान दिएका छन् ।
एकै तरिकाले सबैको हत्या
सेमुअलल् ९० भन्दा बढी महिलाको हत्या गरेका छन् । उनलाई तीनपटक जन्मकैदको सजाय सुनाइएको छ । सोधपुछका क्रममा उनले आफ्नो क्रुर हत्याबारे जानकारी दिएका छन् ।
१९८० को दशकमा उनले एक्लै लस एन्जेलिसमा कैयौं महिलाको हत्या गरेका थिए । अचम्म लाग्दो कुरा त के छ भने सेमुअल एक एक गर्दै हतया गर्दै गए पनि विश्वकै प्रभावकारी मानिएको अमेरिकी प्रहरी उनलाई पक्राउ गर्न असफल थियो ।
उनले सबै हत्या एकै तरिकाले गरेका थिए । प्रहरीले हत्याको प्रकृति हेर्दै सबै हत्या एकै व्यक्तिले गरेको हुनसक्ने अनुमान लगाएको थियो ।
गरिब महिलालाई आफ्नो शिकार बनाउथे
अमेरिकी प्रहरीका अनुसार उनले ज्यादा तर गरिब महिलालाई नै आफ्नो शिकार बनाउने गरेका थिए ।
जो महिला नशाको कुलतमा फसेका हुन्थे त्यस्तैलाई उनले आफ्नो शिकार बनाउथे । एक एक गर्दै निरन्तर हत्या गर्दै गए पनि प्रहरीबाट हरेकपटक उनी बच्दै आएका थिए ।
अमेरिकी प्रहरीले उनलाई वर्षौंदेखि खोजी गर्दै आएको थियो । सन् २०१२ मा पहिलोपटक प्रहरीले उनलाई पक्राउ गरेको थियो । पक्राउ परेपछि उनले एक एक गर्दै आफ्नो अपराध स्वीकार गरेका हुन् ।
३५ वर्षसम्म निरन्तर हत्यामा संलग्न भए पनि अमेरिकी प्रहरीले लामो समयसम्म पक्राउ गर्न नसकेको भन्दै एफबीआईमाथि नै विश्वसनियताको प्रश्न खडा गरेका छन् सेमुअलले ।
