सत्तारुढ नेपाल कम्युनिस्ट पार्टी (नेकपा) भित्र विवाद चर्किएका बेला अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल पक्षले निर्वाचन क्षेत्र स्तरमै गुटगत भेला गर्न थालेका छन् ।

शुक्रवार काठमाडौंको थापाथलीमा युवा–विद्यार्थीको भेला गरेर प्रचण्ड–नेपाल पक्षले शनिवार काठमाडौंको ३ नम्बर निर्वाचन क्षेत्रको गोकर्णेश्वरमा गुटगत भेला गर्दैछ ।

शनिवार दिउँसो १ बजे डाँकिएको भेलामा नेकपा बागमती प्रदेश इन्चार्ज अष्टलक्ष्मी शाक्य प्रमुख अतिथि रहने जनाइएको छ । भेलामा प्रदेश अध्यक्ष नारायण दाहालले समेत सहभागिता जनाउने छन् ।

कार्यक्रममा प्रमुख अतिथि रहने इन्चार्ज शाक्यले पार्टीलाई क्रियाशील बनाउन भेला भइरहेका जानकारी दिइन् । शुक्रवारको युवा–विद्यार्थी भेलामा समेत शाक्य प्रमुख अतिथि थिइने् ।

‘एकतर्फबाट विभिन्न गुट–उपगुटका क्रियाकलाप भइराख्ने र अर्काे पक्ष चुप लाग्ने स्थितिले अप्ठ्यारो हुने भएकाले हाम्रो पक्ष पनि चलायमान गर्न भेलाहरू भइरहेका छन्,’ इन्चार्ज शाक्यले भनिन् ।

यसअघि प्रधानमन्त्री केपी शर्मा ओली पक्षले मदन भण्डारी फाउन्डेसनका नाममा गुटगत भेला गर्दै आएको थियो । पार्टी केन्द्रीय कमिटीले फाउन्डेसनका नाममा हुने गुटगत भेला नगर्ने निर्णय गरेपछि पनि ओली पक्षले भेला नरोकेपछि प्रचण्ड–नेपाल समूह समेत सक्रिय भएको हो ।