१९ असार २०८३, शुक्रबार
उत्तर कोरियाका नेता किम जोङ उनकी बहिनी यो जोङले उत्तरमा कोरोनाको एउटा पनि संक्रमण नरहेको विषयमा दक्षिण कोरियाकी परराष्ट्रमन्त्रीले शंका व्यक्त गरेपछि थर्काएकी छन् । बुधवार उनले बयान जारी गर्दै यस्ता टिप्पणीको परिणाम राम्रो नहुने बताएकी छन् ।
दक्षिणकी परराष्ट्रमन्त्री खाङ ख्युङ–व्हाले उत्तरमा कोरोनाको एउटा पनि संक्रमण नभएको कुरा पत्याउन नसकिने भनी टिप्पणी गरेकी थिइन् । महामारी व्यवस्थापनका लागि सहकार्य गर्न दक्षिण कोरियाले प्रस्ताव गर्दा उत्तरले जवाफ नदिएको उनले बताइन् ।
यो जोङले यसमा प्रतिक्रिया दिँदै बताइन्, ‘उत्तर र दक्षिण कोरियाबीचको सम्बन्धलाई थप चिस्याउनका लागि उनी अति उत्सुक छिन् भन्ने कुरा उनको अनियन्त्रित टिप्पणीले स्पष्ट पारेको छ ।’
‘उनको वास्तविक उद्देश्य स्पष्ट छ । हामी उनको शब्द कहिले पनि बिर्सने छैनौं र उनले यसका लागि महंगो मूल्य चुकाउनुपर्नेछ ।’
यो जोङको बयानले उत्तर कोरिया आफ्नो छविमा कुनै पनि प्रश्न उठाएको सहन सक्दैन भन्ने देखाएको छ । महामारी र आर्थिक सुस्तताका कारण उत्तर अहिले ठूलै समस्यामा छ ।
देशमा एउटा पनि भाइरस नरहेको भनी दाबी गरे पनि उत्तर कोरियाको सरकारी सञ्चारमाध्यमले महामारीविरुद्ध चरम सतर्कता अभियान चलाइरहेको खबर दिएका छन् । सरकारले अन्तर्राष्ट्रिय सीमा बन्द गरेको छ, कूटनीतिकर्मीहरूलाई बाहिर पठाएको छ र कोरोनाको लक्षण देखिएका मानिसलाई आइसोलेसनमा राखेको छ ।
