०२ असार २०८३, मंगलबार
राजस्थानको बाडमेर जिल्लामा आमाछोरीको सम्बन्धमै नकारात्मक सोच पैदा गर्ने खबर सार्वजनिक भएको छ । आमाले बरु आफ्नो जीवन नै सकिए पनि सन्तानको रक्षा गर्छन् । तर, यहाँको घटना हेर्दा आफ्नै आमाले छोरीलाई जानी जानी नर्कको ढोकातिर धकेलेको पाइएको छ ।
छोरीले आफ्नी आमामाथि देह व्यापारमा लगाएको आरोप लगाएकी छन् । यतिमात्र होइन दुई वर्षदेखि देह व्यापारका लागि बाध्य गराएको बताएकी छन् । जब छोरी सहन गर्न नसक्ने अवस्थामा पुगिन् ।
तब उनी प्रहरीकहाँ शरण लिन गइन् । आफ्नो कहानी सुनाएर प्रहरीसँग न्यायका लागि अपिल गरिन् । नवविवाहित छोरीले आफ्नै आमाबाट ज्यानको खतरा रहेको भन्दै सुरक्षा गरिदिन अनुरोध गरेकी छन् ।
बाडमेर जिल्लाको नागाणा थाना क्षेत्रमा एक विवाहित महिलाले प्रहरी अधीरक्षक समक्ष आफ्नी आमा र एक समूहद्वारा देह व्यापारमा धकेल्न बाध्य गराएको उजुरी दिएकी छन् ।
दुई महिनाअघि उनले आफ्नै चाहनाले विवाह गरिन् । तर, त्यसपछि पनि उनकी आमालाई चित्त बुझेन । जसबाट नवविवाहिता छोरीको जीन्दगी पूरै बर्बाद गर्न लागिपरिन् । सहन गर्न नसक्ने भएपछि छोरी प्रहरीको शरणमा पुगेकी हुन् ।
पीडितको उजुरीअनुसार बाडमेर प्रहरी अधीरक्षक आनन्द शर्माले भने, ‘उजुरी हामीले दर्ता गरिसकेका छौं । आफ्नै आमा र उनको समूहले देह व्यापारमा लगाउन गरेको आरोप छ ।’
नवविवाहिता जोडीले आफूहरुलाई ज्यानको खतरा भएको भन्दै सुरक्षाको माग गरेका छन् । आफ्नी आमाले युपीमा देहव्यापार गर्दै आएको आरोप लगाएकी छन् । प्रहरीले तत्काल कारबाही अघि बढाइने बताएको छ ।
