०२ साउन २०८३, शनिबार
कोरोना महामारी रोकथाम तथा नियन्त्रणका लागि स्वास्थ्य सामग्री खरिदमा भएको अनियमितता सम्बन्धमा संसद्को सार्वजनिक लेखा समितिले स्वास्थ्य तथा जनसंख्या मन्त्री भानुभक्त ढकालसँग भोलि जानकारी लिने भएको छ ।
शुक्रवार बस्ने लेखा समितिको बैठकमा मन्त्री ढकाललाई बोलाइएको समिति सभापति भरत शाहले जानकारी दिए ।
कोरोना महामारी नियन्त्रणका लागि आवश्यक स्वास्थ्य सामग्री खरिदमा भएको अनियमितता सम्बन्धमा लेखाले छानबिन गरिरहेको छ ।
ओम्नी समूहसँग स्वास्थ्य सामग्री खरिद गर्दा लागतभन्दा बढी मूल्यमा गुणस्तरहीन सामान खरिद गरिएको लेखा समितिले प्रारम्भिक निष्कर्ष निकालेको थियो ।
गत वर्षको चैत महिनामा स्वास्थ्य सामाग्री खरिदका क्रममा कयौ त्रुटि भेटिएपछि लेखाले स्वास्थ्य मन्त्रालयका सचिव, स्वास्थ्य सेवा विभागमा महानिर्देशक लगायतसँग छलफल गरिसकेको छ ।
बिहीवार बसेको बैठकमा सभापति शाहले भोलि स्वास्थ्य मन्त्रीसँग छलफल गरेर लेखा समिति एउटा टुंगोमा पुग्ने बताए ।
