०७ साउन २०८३, बिहीबार
अमेरिकाका राष्ट्रपति डोनल्ड ट्रम्पले जनवरी २० मा ह्वाइट हाउस नछोड्ने अड्डी कसेका छन् ।
उनले यसरी जिद्दी गरिरहे अमेरिकामा संवैधानिक संकट आउनेछ । जनवरी २० मा जो बाइडनले पदको शपथ लिएपछि ह्वाइट हाउस प्रवेश गर्नुपर्ने हुन्छ तर ट्रम्प त्यहीँ रहिरहँदा अप्ठ्यारो पर्छ ।
आफूलाई षड्यन्त्र गरेर चुनावमा हराइएको ट्रम्पले बताउँदै आएका छन् । कतिपय राज्यमा बाइडनको जीतलाई उनले चुनौती पनि दिएका हुन् तर अदालतले उनका सबै जिकिर खारेज गरिदियो ।
अहिले फेरि जिद्दी गरेर उनले अमेरिकालाई नयाँ संकटमा धकेलिरहेका छन् । ट्रम्पले आफ्ना सहयोगीहरूलाई शपथग्रहणको दिन पनि ह्वाइट हाउस नछोड्ने बताएको स्थानीय सञ्चारमाध्यमले सूत्रलाई उद्धृत गर्दै खबर दिएका छन् । उनका सल्लाहकारहरूले चाहिँ ह्वाइट हाउस छोड्नुको विकल्प नरहेको बताइरहेका छन् ।
यस खबरमा ह्वाइट हाउसबाट प्रतिक्रिया आएको छैन ।
ह्वाइट हाउसकी प्रेस सचिव केली म्याकनेनीले नोभेम्बर ३ मा भएको चुनावको परिणामविरुद्ध कानूनी लडाइँ राष्ट्रपति ट्रम्पले जारी राख्ने बताएका छन् । न्यायिक प्रणालीको उपयोग गर्नु लोकतन्त्रमाथिको आक्रमण नभएको उनले बताइन् ।
