०८ साउन २०८३, शुक्रबार
संयुक्त अरब अमिरातले कोरोनाभाइरसविरुद्ध देशलाई सुरक्षित पार्नका लागि सबै नागरिक तथा निवासीलाई सित्तैमा खोप उपलब्ध गराउने भएको छ ।
चीनको सिनोफार्म कम्पनीले बनाएको र अमिराती अधिकारीहरूले उपयोगका लागि दर्ता गराइसकेको खोप यसै महिनादेखि सार्वजनिक तथा निजी क्लिनिकहरूमा अनि सातैवटा अमिरातहरूका फील्ड हस्पिटलमा उपलब्ध गराइनेछ ।
अन्य मुलुकहरूले उमेर र जोखिमको आधारमा खोप लगाइरहेको भए पनि यूएईले अग्रपंक्तिमा रहेका स्वास्थ्यकर्मीलाई सेप्टेम्बर महिनादेखि नै खोप लगाउन थालेको थियो । अहिले उसले आफ्ना १० लाखभन्दा बढी नागरिक र ८० लाखभन्दा बढी आप्रवासी वयस्क कामदारलाई खोप लगाउने भएको हो ।
देशको पर्यटकीय तथा व्यापारिक केन्द्र दुबईमा खोप लगाउनका लागि एउटा मात्र सार्वजनिक स्थान छ । एउटा थिम पार्कको कम्प्लेक्समा अस्थायी फील्ड अस्पताल बनाइएको छ ।
गत साता दिनको १२ सय कार प्रवेश गर्न दिएको सुरक्षा गार्डहरूले बताएका छन् । तीमध्ये केहीले भित्र पस्नका लागि घन्टौं लाइन लाग्नुपरेको थियो ।
उक्त फील्ड हस्पिटलमा सरकारी स्वास्थ्यकर्मीहरूले पहिला आउने पहिले सेवा दिने तरिका अपनाउँदै दिनको हजारभन्दा बढी डोज दिएका छन् । कोरोनाको कडा लक्षणको जोखिम रहेकाहरूलाई खोपमा प्राथमिकता दिइएको छ ।
अबु धाबी र अन्य अमिरातहरूमा सरकारी स्वास्थ्य केन्द्र तथा निजी अस्पताल र क्लिनिकहरूले खोप उपलब्ध गराएका छन् ।
