१० साउन २०८३, आइतबार
प्रधानमन्त्री एवं नेकपा अध्यक्ष केपी शर्मा ओलीले पुष्पकमल दाहाल प्रचण्डको कार्यकर्ता भइसकेपछि पूर्व एमालेको सम्पत्तिमा माधव नेपालले दावी गर्न नमिल्ने बताएका छन् । प्रचण्डको कार्यकर्ता भएपछि प्रचण्डकै सम्पत्तिमा रमाउन ओलीले नेपाललाई सुझाव दिए । प्रचण्डको पेरिसडाँडाको कार्यालयमा आफूले दावी नगर्ने र नेकपाको कार्यालयमा पनि दावी नगर्न आग्रह गरे ।
‘प्रचण्डजी र मैले एकता गरेका थियौँ, प्रचण्डजी र म मिलेनौँ । प्रचण्डजी आफ्नो पार्टीमा केही साथीहरु लिएर जानुभयो । विभाजन भएको माधव नेपाल र मेरो होइन, झलनाथ र मेरो होइन, नारायणकाजीसँग त हुने कुरै भएन । विभाजन भएको प्रचण्डजीसँग हो’ बुधवार योहो टिभीलाई अन्तवार्ता दिँदै ओलीले भने, ‘प्रचण्डसँग रहेको सम्पत्ति लिएर जानुस् । माधवजी प्रचण्डसँग गइसक्नु भयो । हिजो चुनाव जितेको अध्यक्ष भए दावी गर्न सक्नु हुन्थ्यो, अध्यक्ष जित्नु भएको त होइन नि । प्रचण्डजीको कार्यकर्ताले प्रचण्डजीकै श्री सम्पत्तिमा रमाउन सिक्नु पर्यो नि, त्यही घरमा रमाउनुस् ।’
प्रधानमन्त्री ओलीले आफूले अहिलेसम्म पार्टी फुटेको भनेर नबुझेको बताए । ‘हिजो प्रवक्ता परिवर्तन गरें, प्रवक्ताका सधैंका अभिव्यक्ति पार्टी नीति अनुसार भएनन् त्यसबाहेक अरु निर्णय भएको छैन’ ओलीले भने ।
