२६ असार २०८३, शुक्रबार
अमेरिकाका राष्ट्रपति डोनल्ड ट्रम्पले जर्जिया राज्यका सेक्रेटरी अफ स्टेटलाई पर्याप्त भोट खोजेर चुनाव परिणाम उल्ट्याउन आदेश दिएको अडियोटेप आइतवार सार्वजनिक भएको छ ।
ट्रम्प र रिपब्लिकन पार्टीका ब्राड राफेनस्पर्गरबीचको कुराकानी द वाशिङटन पोस्टले फेला पारेको हो । त्यसमा ट्रम्पले राफेनस्पर्गर र अर्का एक अधिकारीलाई धम्की दिँदै बाइडनको विजयलाई उनीहरूले उल्ट्याउन नसकेमा ठूलो जोखिम मोल्नुपर्ने भनेको सुनिन्छ ।
बाइडनले उक्त राज्य १२ हजार भोटभन्दा कम ल्याएर जितेका थिए । त्यो साँघुरो अन्तर हो र विभिन्नपटक गणना गर्दा पनि त्यसमा कुनै परिवर्तन आएको छैन ।
‘
अहिलेको अन्तर जम्मा ११ हजार ७७९ छ । ब्राड, त्यो सही छ हैन ? मेरो एउटा काम गरिदिनुस् । मलाई ११ हजार ७८० भोट भए पुग्छ,’ ट्रम्पले भनेको सुनिन्छ ।
ट्रम्पले यस्तो कल गर्नु आश्चर्यजनक छ किनकि मानौं जर्जियामा मतपरिणाम पल्टियो भने पनि त्यसको १६ इलेक्टोरल कलेज भोटले अन्तिम परिणाममा फरक पार्ने छैन । बाइडनले ३०६ र ट्रम्पले २३२ इलेक्टोरल कलेज भोट ल्याएका छन् ।
यो टेप, बाइडनको जीतलाई रिपब्लिकनहरूले दिएको चुनौती, जर्जियामा हुन लागेका दुईवटा रनअफ चुनाव जसले अमेरिकी सिनेटमा नियन्त्रणलाई सुनिश्चित गर्छ अनि वाशिङटनमा ट्रम्पसमर्थक विरोध प्रदर्शन लगायतले अमेरिकी राजनीतिमा भयंकर विवाद हुने देखिन्छ ।
