रुपन्देहीको तिलोत्तमामा लगानी सम्मेलनमा समझदारी भए अनुसार तिलोत्तमा चक्रपथमा ट्राम रेल सञ्चालन गर्न तिलोत्तमा पब्लिक रेल्वे कम्पनी लिमिटेडले डीपीआरको काम शुरू गरेको छ ।

परामर्शदाता कम्पनी मुन स्टार इन्जिनीयरिङ कन्सल्टेन्सी प्रालिमार्फत् गरिने डीपीआरको केही दिनअघि तिलोत्तमा नगर प्रमुख बासुदेव घिमिरेले योगिकुटीमा शुभारम्भ गरेका थिए ।

करीब ५० किलोमिटरको तिलोत्तमा चक्रपथमा ट्राम रेल सञ्चालनको लागि डीपीआर बनाइँदैछ । तिलोत्तमा पब्लिक रेल्वे कम्पनी लिमिटेडका प्रबन्ध सञ्चालक भोला शर्माका अनुसार आगामी वर्षदेखि पहिलो चरणको लीग निर्माण गर्ने गरी काम अघि बढाइएको छ ।

सामुदायिक लगानीमा रेल सञ्चालनको लागि आवश्यक तयारीको काम अघि बढाइएको हो । नेपालमै नमूना र सरकार आफैंले गर्नुपर्ने काममा स्थानीयले अग्रसरता देखाएकाले स्थानीय, प्रदेश र संघीय सरकारको समेत सहयोग रहने लगानीकर्ताको विश्वास छ । 

तिलोत्तमा नगरपालिका प्रमुख बासुदेव घिमिरेले पब्लिक शेयरमा सञ्चालन हुने रेलका लागि नगरपालिकाले सक्दो सहयोग गर्ने बताए । रेल्वे निर्माणमा आउने बाधा अड्चन फुकाउन र सक्दो आर्थिक सहयोग गर्न नगरपालिका तयार रहेको बताउँदै नगर प्रमुख घिमिरेले रेल्वेको काम तोकिएकै समयमा सम्पन्न हुने र सञ्चालन हुने विश्वास व्यक्त गरे ।

२ वर्षभित्र योगिकुटीदेखि रोहिणी नदीको जलासयसम्मको १४ किलोमिटर सडकमा रेल सञ्चालन गर्ने लक्ष्यका साथ काम अघि बढाइएको प्रबन्ध सञ्चालक शर्माले जानकारी दिए ।

रेल्वे कम्पनीका अध्यक्ष बाबुराम अर्याल कृषि र पर्यकटीय हिसाबमा रेलप्रति सबैको आकर्षण रहने बताउँदै परियोजना नगरपालिकाको मार्गदर्शनमा अघि बढेको स्पष्ट पारे । रेल सञ्चालन हुँदा सडकमा कुनै अवरोध नहुने र कोलाहल पनि नहुने उनले बताए ।

ट्राम पर्यटकीय रेल भएकाले मानव बस्तीलाई कुनै अवरोध नगर्ने र सडकमा समस्या हुँदा बे्रक लगाएर पनि रेल रोक्न सकिने प्रबन्ध सञ्चालक शर्माले बताए । तिलोत्तमा नगर प्रमुखले देखाएको तत्परताको कारण परियोजनाको काम अघि बढेको उनले बताए ।

रेल सञ्चालनका लागि बाटो, पैसा र रेल कहाँबाट ल्याउने भन्ने प्रमुख समस्या रहने गरेकोमा तिलोत्तममा सञ्चालन हुने रेलका लागि यी विषयमा कुनै समस्या नभएको उनले बताए । उनले लगानीको लागि नगरबासी नै धेरै आतुर भएको आफूले पाएको बताए ।

भविष्यमा तिलोत्तमामा हुने मानिसको आवतजावतको कारण पनि रेल सञ्चालनमा कुनै समस्या नहुने र यसले लगानीको प्रतिफल दिने भन्दै उनले ढुक्क भएर लगानी गर्न सबैलाई आह्वान गरे । तिलोत्तमा नगरपालिका–२ का वडाध्यक्ष दधिराम गौतम, तिलोत्तमा पप्लिक रेल्वे कम्पनी लिमिटेडका उपाध्यक्ष हरि तिवारीले रेल सञ्चालनमा सबैको सहयोग र सल्लाह आवश्यक पर्नेमा जोड दिए ।

मुन स्टार इन्जिनीयरिङ कन्सल्टेन्सी प्रालिले ७–८ महिनाभित्र डीपीआरको काम सम्पन्न गर्ने बताइएको छ । हालसम्म ५०१ जनाको शेयर रहेकोमा लगानी खुला गरिएको सञ्चालक डिल्लीनारायण पाण्डेले जानकारी गराए ।