प्रतिनिधि सभा विघटनविरुद्ध परेको रिटमाथिको सुनुवाइका क्रममा अदालतले बोलाएको एमिकस क्युरीमा रहेकी वरिष्ठ अधिवक्ता गीता पाठकले पाँचै जनाले इजलासमा कुरा राख्न पाउनु पर्ने बताएकी छन् ।

प्रधानन्यायाधीश चोलेन्द्र शमशेर जबरा नेतृत्वको इजलासमा शुक्रवार भएको सुनुवाइमा एमिकस क्युरीको तर्फबाट बद्रीबहादुर कार्कीले सुझाव पेश गरेका थिए ।

उनले न्यायाधीशको संख्या बढाएर यही इजलासमा सुनुवाइ गर्न सकिने सुझाव दिए ।

त्यसपछि इजलासबाट न्यायाधीशले बहस सकियो भनेपछि पाठकले अब्जेक्सन जनाएकी हुन् ।

‘कि कसैको कुरा सुन्नुहुँदैन, नभए पाँचैजनाको कुरा सुन्नुपर्छ’ सर्वोच्च बारका तर्फबाट एमिकस क्युरीमा रहेकी पाठकले भनिन् । 

अहिले १५ मिनेटका लागि चिया ब्रेक भएको छ । 

प्रतिनिधि सभा विघटनविरुद्धको रिट संवैधानिक इजलासमै सुनुवाइ गर्ने कि वृहत् पूर्ण इजलासमा पठाउने भन्नेबारे अदालत आजै टुंगोमा पुग्ने अपेक्षा गरिएको छ ।