बिहीवारदेखि देशभरका फिल्म हलमा चलचित्र प्रदर्शन शुरू भएको छ । १५० जति हलका गेट खुला भएका छन् ।

शिव श्रेष्ठले निर्माण गरेको चलचित्र ‘एउटा यस्तो प्रेम कहानी’ र बलिउडको ‘मास्टर’ चलचित्र प्रदर्शनमा आएका छन् ।

तर १० महिनापछि खुलेका फिल्म हलमा नेपाली चलचित्रलाई दर्शकले खासै चासो नदिएको पाइएको छ । पहिलो र दोस्रो दिनको शो हेर्न दर्शकमा उत्साह देखिएन । शनिवार के कस्तो व्यापार हुन्छ हेर्न बाँकी छ । तथापि ‘मास्टर’का धेरैजसो शोहरू भरिभराउ रहेका हल सञ्चालकको भनाइ छ ।

५ भाषामा निर्माण गरिएको तमिल चलचित्र ‘मास्टर’का लागि टिकट नपाएर दर्शकलाई फर्कानुपर्ने अवस्था आइपरेको लबिम मलले जनाएको छ । नेपाली चलचित्र प्रदर्शनमा रहेका अधिकांश हलमा ५–७ जना दर्शक मात्रै आइरहेकाले अब नेपाली शो हटाएर ‘मास्टर’ लगाउने तयारीमा रहेको क्युएफक्सले जनाएको छ ।

मास्टरका हरेक दिनका बुकिङ ‘हाउसफुल’ देखिए पनि नेपाली चलचित्र ‘एउटा यस्तो प्रेम कहानी’मा दर्शकको पातलो उपस्थितिले नेपाली चलचित्रप्रति दर्शकको चासो अझै नबढेको महसूस गरिएको छ । 

अहिले विगतमा जस्तो दर्शक प्रवेश गराउन पाइँदैन । ५० प्रतिशत दर्शक मात्रै राख्न पाइने नियमअनुसार देशभरका अधिकांश हलमा तमिलको शो भरिभराउ छ ।

एउटा यस्तो प्रेम कहानीका प्रस्तुतकर्ता तथा कलाकार शिव श्रेष्ठले महामारीपछि नेपाली चलचित्र उद्योगलाई चलायमान गराउन जोखिम मोलेको प्रतिक्रिया दिँदै दर्शकको उपस्थिति सन्तोषजनक रहेको दाबी गरे । मनोज राठी र उनको टीमले मास्टर नेपाल ल्याएको हो । तर शिव श्रेष्ठको टीमले देशका केही स्थानमा हार्डडिक्समा फिल्म समय नपठाउँदा एउटा यस्तो प्रेम कहानी हेर्न नपाएको प्रतिक्रिया दिएको छ ।

यस विषयमा खुलेर केही नबोले पनि हल सञ्चालकको लापरवाही नभएको खण्डमा नेपाली चलचित्रले उत्साजनक व्यापार गर्नेमा आफू विश्वस्त रहेको उनले बताए । बानेश्वरस्थित वान सिनेमाले समेत पहिलो दिनदेखि बाहिरको चलचित्र हेर्न भीडभाड रहे पनि नेपाली चलचित्रमा दर्शक नआएको बताएको छ ।

लबिम मलको क्युएफएक्समा पहिलो दिन ‘एउटा यस्तो प्रेम कहानी’का २ वटा शो राखिएका थिए । बिहान ११ बजे निर्माण टोलीको विशेष प्रिमियर शो थियो । शोमा पाहुनाहरू राम्रै उपस्थित भए पनि दिउँसो ३ बजेको शोमा १५–२० जनाको हाराहारी मात्रै दर्शक उपस्थित भए । 

क्युएफएक्सका प्रमुख कार्यकारी अधिकृत रोशन अडिगाले देशभरका क्युएफएक्सका शाखामा दर्शकको उपस्थित निकै राम्रो रहेको प्रतिक्रिया दिए ।

उनले भने, ‘स्वाभाविकै हो, नेपाली चलचित्रमा भन्दा तमिलामा धेरै उपस्थित छ । यो पहिलेदेखिको नेपालीको स्वभाव हो । तर जुन शो हेर्न दर्शक आए पनि यसले समग्र चलचित्र उद्योगलाई चलायमान बनाउनुका साथै हलमा दर्शक आकर्षिक हुने बाटो खुला भएको छ ।’