भारतले देशमा बनाएको कोभिडविरुद्धको खोप छिमेकी मुलुकहरूलाई केही हप्ताभित्रै निर्यात गर्ने भएको छ । 

शुरूमा भारतका छिमेकीहरू नेपाल, भुटान, बंगलादेश, म्यान्मार, श्रीलंका, अफगानिस्तान, माल्दिभ्स र मौरिससमा खोप पठाइनेछ । 

पहिलो खेप सद्भावका लागि पठाइनेछ भने त्यसपछिका खेपहरूको पैसा तत्तत् देशहरूले सिरम इन्स्टिच्युट वा भारत बायोटेकलाई तिर्नुपर्नेछ ।

भारतले शनिवारबाट कोभिडविरुद्धको खोप लगाउन थालेको छ । पहिलो दिन १ लाख ९० हजार मानिसले खोप लागएका छन् ।

भारत सरकारसँग कोभिड खोपको अनुरोध गर्ने नेपाल पछिल्लो मुलुक हो । म्यान्मार र बंगलादेशले सिरम इन्स्टिच्युटसँग खोपका लागि सम्झौता गरिसकेका छन् । 
 

भारतीयहरूले तिरेकै जति रकम अन्य देशले पनि तिर्ने भारत सरकारका स्रोतहरूले द टाइम्स अफ इन्डिया पत्रिकालाई बताएका छन् । तर भारतले आफ्नो जनसंख्यालाई पर्याप्त भएपछि मात्र निर्यात गर्ने योजना रहेको उनीहरूको भनाइ छ । 

टाढाका अन्य मुलुकहरूका स्वास्थ्य संस्थाले भारतका कम्पनीहरूसँग सम्झौता गरेपछि मात्र खोप पाउनेछन् । ब्राजिलको फियोक्रुज इन्स्टिचुटले भारतको सिरम इन्स्टिच्युटसँग सम्झौता गरिसकेको छ । यूएई, साउदी अरब, ​मोरक्को, दक्षिण अफ्रिका लगायतका मुलुकले पनि सम्झौता गरेका छन् । तर उनीहरूले भारत सरकारबाट क्लियरेन्स लिनुपर्छ ।