०२ साउन २०८३, शनिबार
प्रतिनिधि सभा विघटनविरुद्ध सर्वोच्च अदालतको संवैधानिक इजलासमा भइरहेको सुनुवाइ लम्बिएपछि न्यायाधीश सपना प्रधान मल्लले यो मुद्दालाई कति लम्ब्याउने भनेर रिट निवेदक एवं विघटित प्रतिनिधि सभाका एक सांसदसँग प्रश्न गरेकी छन् ।
प्रधानन्यायाधीश चोलेन्द्र शमशेर राणा नेतृत्वको संवैधानिक इजलासमा बुधवार लगातार दशौं दिनको सुनुवाइका क्रममा रिट निवेदक कृष्णभक्त पोखरेलसँग न्यायाधीश मल्लले यो मुद्दालाई कति लम्ब्याउने भनेर प्रश्न गरेकी हुन् ।
जवाफमा पोखरेलले मुद्दा लम्ब्याउन नहुने पक्षमा आफूहरू सचेत रहेको बताए । राष्ट्रकै ध्यान केन्द्रित भएको विषय भएकाले बहस गर्नेको संख्या बढेको भए पनि बहस लम्ब्याउने पक्षमा आफूहरू नरहेको उनले बताए ।
आफूहरूले कसैलाई पनि पैसा दिएर बहस नगराएको उनले बताए ।
बहसका क्रममा पोखरेलले प्रतिनिधि सभा विघटन गर्न पाउने कुनैपनि संवैधानिक र कानूनी आधार नभएको बताए ।
त्यसअघि नेपाल बार एसोसिएसनका पूर्व अध्यक्ष एवं वरिष्ठ अधिवक्ता शेरबहादुर केसीले इजलाससमक्ष प्रतिनिधि सभा विघटन गर्न नमिल्ने जिकिर गरेका थिए ।
