१० साउन २०८३, आइतबार
म्यान्मारमा सेनाले कू गर्ने चर्चा चल्दै गर्दा त्यहाँको सेनाले संविधानको रक्षा र पालन गर्ने अनि कानूनमुताबिक चल्ने दाबी गरेको छ ।
सन् १९६२ मा सेनाले कू गरेर ४९ वर्षसम्म शासन चलाएको थियो ।
संयुक्त राष्ट्रसंघका महासचिव एन्टोनियो गुटेरेस र म्यान्मारमा रहेको पश्चिमी मुलुकहरूका राजदूतले कूको आशंका गरेका थिए । तर कमान्डर इन चीफ जनरल मिन आङ लाइङको बयानलाई गलत तरिकाले प्रस्तुत गरिएको सेनाको दाबी छ ।
देशकी सर्वोच्च नेत्री आङ सान सू चीको सत्तारूढ दल नेसनल लीग फर डेमोक्रेसीले सेनाबाट उचित सफाइ आएको बतायो । नोभेम्बर महिनामा भएको निर्वाचनमा उक्त दलले प्रचण्ड बहुमत ल्याएको थियो ।
म्यान्मारको संविधानमा सेनालाई संसदमा २५ प्रतिशत सीट र तीन मन्त्रालयको अधिकार दिइएको छ ।
संसद्को नयाँ सत्र शुरू हुनुअघि सेनाले चुनावमा धाँधली भएको उजुरीमा कारवाही नगरिएमा सेनाले एक्सन लिने चेतावनी दिएको थियो ।
यही हप्ता राजनीतिक तनाव बढ्दा सेनाका प्रवक्ताले कूको सम्भावनालाई खारिज गर्न अस्वीकार गरेका थिए । कमान्डर इन चीफले संविधान पालन नगरिएमा फिर्ता लिन पनि सकिने बताएका थिए ।
विवाद चलेपछि सेनाको समर्थनमा म्यान्मारका कैयौं शहरमा प्रदर्शन भएका थिए । शनिवार देशको आर्थिक राजधानी यंगूनमा २०० जनाले ब्यानर सहित प्रदर्शन गरेका थिए ।
उता म्यान्मारको निर्वाचन आयोगले सेनाको आरोप खारेज गर्दै धाँधलीको कुनै उदाहरण नभेटिएको बताएको छ ।
