२३ जेठ २०८३, शनिबार
कोरोना भाइरस संक्रमणका कारण लामो समय ठप्प रहेका खेलकुद गतिविधि पोखरामा सञ्चालन हुने तयारीमा छन् ।
वर्षभर नै खेलकुद गतिविधि भइरहने पोखरामा कोरोना महामारीपछि गत चैत पहिलो हप्तादेखि खेल गतिविधि रोकिएकामा पछिल्लो समय फूटबल, भलिबल लगायत खेलका प्रतियोगिताका तयारी गरिएको छ ।
गत मंसिर पहिलो सातादेखि सरकारले खेलकुद प्रशिक्षण लगायतका गतिविधि सञ्चालन गर्ने निर्णय गरेपछि खेल प्रशिक्षण तथा प्रतियोगिता सञ्चालन गर्न लागिएको हो ।
कास्की जिल्ला भलिबल संघको आयोजनामा पोखरामा फागुन पहिलो हप्ता ‘मुख्यमन्त्री कप महिला तथा पुरुष अन्तर जिल्ला’ भलिबल प्रतियोगिता हुने भएको छ । भलिबल खेलका माध्यमबाट गण्डकी प्रदेशलाई ‘खेलकुदको हब’का रूपमा विकास गर्ने लक्ष्यसहित आगामी फागुन ४ देखि ८ गतेसम्म पोखरा रंगशालाभित्रको भलिबल कोर्टमा प्रतियोगिता गरिने संघका जिल्ला अध्यक्ष भीम पराजुलीले जानकारी दिए ।
उनका अनुसार प्रतियोगिताको तयारीस्वरुप अहिले जिल्लास्तरमा खेलाडी छनोट प्रक्रिया सञ्चालन भइरहेको छ । उनले भने, ‘गण्डकी प्रदेशमा तय भएको नवौं राष्ट्रिय खेलकुद प्रतियोगितालार्ई लक्ष्य गरी प्रतिभावान भलिबल खेलाडी उत्पादन गर्ने तथा प्रदेशमा खेलकुद विकासको उद्देश्यले पहिलोपटक मुख्यमन्त्री कप गर्न लागेका हौं । खेलाडी छनोटलगायत तयारीका काम भइरहेको छ ।’
प्रतियोगिताको विजेता महिला र पुरुष टोलीले समान २ लाख र ट्रफी पुरस्कार प्राप्त गर्नेछन् भने उपविजेताले १ लाख पुरस्कार प्राप्त गर्ने आयोजकले जनाएको छ । यसैगरी तृतीय टोलीले ५० हजार रुपैयाँका दरले पुरस्कार प्राप्त गर्नेछन् ।
प्रतियोगितामा उत्कृष्ट हुने महिला तथा पुरुष खेलाडीले नगद ५/५ हजार तथा उत्कृष्ट ‘सेटर’, ‘डिफेण्डर’, ‘स्पाइकर’ र ‘लिफ्टर’ले समेत ५ हजार रुपैयाँका दरले पुरस्कार पाउने छन् ।
गण्डकी प्रदेशको कास्की, स्याङ्जा, गोरखा, तनहुँ, मनाङ, मुस्ताङ, नवलपुर, म्याग्दी, बागलुङ, लमजुङ र पर्वत गरी ११ वटै जिल्लाको प्रतियोगितामा सहभागिता रहने आयोजकले जनाएको छ ।
