२१ जेठ २०८३, बिहीबार
अमेरिकाको विमानवाहक युद्धपोत यूएसएस निमित्ज र स्ट्राइक ग्रूप पश्चिम एसियाबाट झिकेर हिन्द प्रशान्त क्षेत्रमा तैनाथ गर्न लागिएको अमेरिकी रक्षा मन्त्रालय पेन्टागनले जनाएको छ ।
इरानसँगको तनाव घटाउनका लागि युद्धपोत सेन्ट्रल कमान्डबाट हटाउन लागिएको विश्लेषण हुन थालेका छन् । अनि जो बाइडन प्रशासनले डोनल्ड ट्रम्प प्रशासनकै नीतिलाई निरन्तरता दिँदै चीनप्रति कठोर धारणा राख्ने पनि यसबाट देखिएको छ ।
बाइडनले अहिलेसम्म चिनियाँ समकक्षी सी चिनफिङसँग कुराकानी गरेका छैनन् । अमेरिकाले पहिला साझेदारहरूसँग एकमत भएपछि बल्ल चीनसँग सम्पर्क गर्ने त्यहाँको परराष्ट्र मन्त्रालयले जनाएको छ ।
‘रक्षामन्त्री लोयड अस्टिनले विस्तृत भूरणनीतिक तस्वीरलाई विचार गर्दै सेन्ट्रल कमान्डको जिम्मेवारी क्षेत्रबाट हटाएर हिन्द प्रशान्त क्षेत्रमा तैनाथ गर्ने निर्णयलाई समर्थन गर्नुभएको हो,’ रक्षा मन्त्रालयले जानकारी दिएको छ ।
यस तैनाथीबाट अमेरिकाले दक्षिण चीन सागरमा उपस्थिति बढाउने संकेत पाइएको छ । यसले एसिया प्रशान्त क्षेत्रका ३६ देशहरूको आत्मविश्वास बढ्ने बताइएको छ । तीमध्ये धेरै मुलुकको सीमाविवाद चीनसँग छ ।
अर्को विमानवाहक युद्धपोत समूह यूएसएस थियोडोर रूजवेल्ट दक्षिण चीन सागर अघिल्लो महिना पुगेको थियो । समुद्रहरूको स्वतन्त्रतालाई त्यसले प्रवर्धन गर्ने बताइएको छ ।
चीनले ताइवान जलसन्धिमा बमवर्षक विमान सहित दर्जनौं सैन्य विमान उडाएपछि यो युद्धपोत बाशी जलसन्धि हुँदै दक्षिण चीन सागरमा तैनाथ गरिएको हो ।
