अमेरिकाका दुई युद्धपोत समूहहरूले दक्षिण चीन सागरमा मंगलवार संयुक्त अभ्यास गरेका छन् । 

केही दिनअघि ती युद्धपोतहरू उक्त क्षेत्रमा पुगेका हुन् । अमेरिकाले शान्ति र स्थिरता खलबल्याएको भन्दै चीनले आलोचना गरेको छ । 
 

थियोडोर रूजवेल्ट क्यारियर स्ट्राइक ग्रूप र निमित्ज क्यारियर स्ट्राइक ग्रूपले संयुक्त अभ्यास गरेको अमेरिकी जलसेनाले जानकारी दिएको छ । सन् २०२० को जुलाई महिनापछि पहिलोपटक त्यस क्षेत्रमा संयुक्त अभ्यास गरिएको हो । 

चीनको परराष्ट्र मन्त्रालयका प्रवक्ता वाङ वेनबिनले अमेरिकी युद्धपोत तथा विमानहरू शक्तिप्रदर्शनका लागि दक्षिण चीन सागरमा आइरहँदा क्षेत्रीय शान्ति र स्थिरता कायम नहुने बताए । 

‘चीनले राष्ट्रिय सुरक्षा तथा सार्वभौमसत्ताको रक्षाका लागि आवश्यक कदम चालिरहनेछ र दक्षिण चीन सागर क्षेत्रमा शान्ति र स्थिरताका लागि अन्य मुलुकहरूसँग मिलेर काम गर्नेछ,’ उनले बताए ।