प्रतिनिधि सभा विघटनको विरोधमा आन्दोलनरत नेपाल कम्युनिस्ट पार्टी (नेकपा) प्रचण्ड–नेपाल पक्षले आयोजना गरेको विरोध सभा भृकुटीमण्डपमा शुरू भएको छ ।

सभामा अध्यक्षद्वय पुष्पकमल दाहाल 'प्रचण्ड' र माधव नेपाल, वरिष्ठ नेता झलनाथ खनाल, प्रवक्ता नारायणकाजी श्रेष्ठ लगायत नेताहरू सहभागी छन् ।

सभाको मुख्य वक्ता प्रचण्ड रहेका छन् । आलोपालो बैठकको अध्यक्षता र सभाहरूमा प्रमुख आतिथ्य गर्ने गरेकोमा आज प्रचण्डको पालो परेको प्रचण्ड-नेपाल पक्षका एक नेताले बताए ।

स्थायी कमिटी सदस्य लीलामणि पोखरेलले सञ्चालन गरेको सभामा १४ जनाले सम्बोधन गर्ने तय भएको छ ।

सभाका लागि दलित, जनजाति, मधेशी, महिला आदिलाई समानुपातिक प्रतिनिधित्वका आधारमा सम्बोधन गर्न दिने गरी कार्यसूची तय भएको छ ।

यो सभालाई प्रचण्ड-नेपाल पक्षले तेस्रो चरणको आन्दोलनको उत्कर्षका रूपमा लिएको छ ।