नेकपा प्रचण्ड–नेपाल समूहकी नेतृ अञ्जना बिशंखेले प्रधानमन्त्री केपी शर्मा ओली संघीयता, धर्मनिरपेक्षता र समानुपातिक समावेशीको पक्षमा कहिल्यै नरहेको आरोप लगाएकी छन् ।

केबल प्रधानमन्त्री बन्नका लागि मात्र ओली त्यसको साक्षी बसेको उनको आरोप छ ।

नेकपा प्रचण्ड-नेपाल पक्षले बुधवार भृकुटीमण्डपमा आयोजना गरेको विरोध सभामा सम्बोधन गर्दै उनले भनिन्- 'संघीयता, धर्मनिरपेक्षता र संविधानमा लेखिएको समानुपातिक समावेशी लगायतका एजेन्डालाई कार्यान्वयन गर्नका लागि हामी सडकमा आएका छौं । ती मुद्दाहरू अहिले सडकमा छरिएका छन् । ती हाम्रा मुद्दा थिए, केपी ओलीका मुद्दा थिएनन् । उनी केबल प्रधानमन्त्री बन्नका लागि साक्षी बसेका थिए ।'

उनले प्रधानमन्त्री ओलीको नाटकलाई सडकले नंग्याइसकेको समेत बताइन् ।

'प्रधानमन्त्रीको नाटकलाई यो सडकले नंग्याइसकेको छ, हामी प्रतिगमनको विरोधमा छौं,' उनले भनिन् ।