नेकपा सचिवालय सदस्य एवं प्रवक्ता नारायणकाजी श्रेष्ठले प्रधानमन्त्री केपी शर्मा ओलीले नेपालमा फासीवादको अभ्यास गरिरहेको आरोप लगाएका छन् ।

संविधान अनुसार हुने चुनावको पक्षमा रहेपनि संविधानलाई घात गर्न घोषणा गरिएको चुनाव स्वीकार नगर्ने उनले बताए ।

प्रतिनिधि सभा विघटनको विरोधमा नेकपा (प्रचण्ड–नेपाल समूह)ले बुधवार काठमाडौंमा आयोजना गरेको सभालाई सम्बोधन गर्दै प्रवक्ता श्रेष्ठले ओलीले नेपालमा फासीवादको अभ्यास गरिरहेको आरोप लगाएका हुन् । 

‘विश्वमा अहिले दुई ढंगले फासीवाद लागू हुँदैछ । संविधानलाई औपचारिक खारेज नगरी संविधानका धारामा कालो पोतेर फासीवाद लागू गरिँदैछ । ओली फासिस्ट हुन्, ओलीले फासीवादको अभ्यास गर्दैछन्,’ श्रेष्ठले भने । 

सन् १९१९ मा इटलीका तानाशाह बेनिटो मुसोलिनीले फासीवादी दल शुरू गरेका थिए । यस्तो दलको चरित्र निरंकुशतावादी हुन्छ, यसले विपक्षीहरूलाई बलपूर्वक दमन गर्छ र समाजलाई ध्रुवीकृत गर्छ ।

प्रवक्ता श्रेष्ठले प्रधानमन्त्री केपी शर्मा ओलीले नारायणहिटी गेटबाट लोकतन्त्र मास्न दिँदैनौं भनेर ठट्टा गरेको उनले टिप्पणी गरे । 

‘तपाईंहरूले केपी ओलीको ठट्टा सुन्नुभएको होला प्रतिगामी कदमबाट लोकतन्त्रको रक्षा गर्छौं रे ! फासीवाद लागू गर्ने नयाँ तरिका हो’ उनले भने । 

प्रवक्ता श्रेष्ठले प्रतिनिधि सभा विघटनविरुद्ध संयुक्त आन्दोलन नभएपनि एकीकृत आन्दोलनले प्रतिनिधि सभा पुनःस्थापना गराउने विश्वास व्यक्त गरे । 

‘हामी चुनावको पक्षमा छौं, सारा लोकतन्त्रवादी छन्, तर कुन चुनाव ? संविधान अन्तर्गतको चुनाव कि संविधानलाई अपहरण गर्ने लोकतन्त्रलाई घात गर्ने चुनाव ?’ श्रेष्ठले भने, ‘लोकतन्त्रलाई सुदृढ बनाउन चुनाव चाहिन्छ । लोकतन्त्रको हत्या गर्ने चुनाव होइन, यो चुनाव वास्तवमा गर्न घोषणा गरेको होइन ।’