कोरोना कहरका कारण स्थगित भएको ‘गाउँघरमा चिकित्सक’ कार्यक्रम सञ्चालनमा आएको छ ।

निःशुल्करूपमा गाउँघरमै चिकित्सकीय सेवा दिने उद्देश्यले कार्यक्रम सञ्चालनमा ल्याइएको हो । 

हालसम्म जिल्लाका ३ स्थानीय तहमा कार्यक्रम सम्पन्न भइसकेको जिल्ला अस्पताल बैतडीका प्रमुख डा. वसन्तराज जोशीले जानकारी दिए ।

मेलौली नगरपालिका सिगास गाउँपालिका र पञ्चेश्वर गाउँपालिकामा कार्यक्रम सम्पन्न भइसकेको छ । उनले भने, ‘प्रत्येक स्थानीय तहमा २ दिने शिविर सञ्चालन गरेर सेवा दिन्छौं ।’ ३ वटै स्थानीय तहमा गरेर १ हजार ६०० जनालाई सेवा प्रदान गरिएको जिल्ला अस्पतालले जनाएको छ । 

शिविरमा जनरल ओपीडी, अल्ट्रासाउन्ड, प्रयोगशाला, परिवार नियोजन, दन्त, अपाङ्गता परिचय पत्रका लागि सिफारिस, औषधि वितरण लगायतका सेवा प्रदान गरिँदै आएका छन् ।

ग्रामीण क्षेत्रका नागरिकलाई गाउँघरमै पुगेर स्वास्थ्य सेवा प्रदान गर्ने उद्देश्यले शिविरको आयोजना गरिएको हो । 

जिल्ला अस्पतालमा पुग्न सहज नभएका पालिकाका नागरिकलाई गाउँघरमै चिकित्सक पुगेर सेवा दिने उद्देश्यले शिविरको आयोजना गरिएको डा. जोशीले बताए । चालू आर्थिक वर्षमा जिल्लाका ५ वटा दुर्गम पालिकामा शिविर सञ्चालन गरेर विभिन्न सेवा एकीकृत रूपमा दिने लक्ष्य रहेको जिल्ला अस्पतालले जनाएको छ ।

प्रदेश सरकारको कार्यक्रम अन्तर्गत स्वास्थ्य कार्यालयको आयोजनाका शिविर सञ्चालन भइरहेको छ ।