भारतको गुजरातमा बस्ने अनि आफूलाई राजनीतिक विश्लेषक भनी चिनाउने एक महिलाले बम्बे उच्च अदालतकी न्यायाधीश पुष्पा गनेडीवालालाई कन्डमको प्याकेट पठाएकी छन् । 

न्यायाधीश गनेडीवालाका विवादास्पद फैसलाले समाजमा रहेका अपराधीहरूमा गलत सन्देश प्रवाह गर्ने देवश्री त्रिवेदी नामक ती महिलाको भनाइ छ ।
 

त्रिवेदीले १२ वटा प्याकेटमा १५० वटा कन्डम प्याक गरेको यूट्युब भिडियो पनि अप्लोड गरेकी छन् । ती प्याकेट उनले उच्च अदालतमा अनि न्यायाधीशको सरकारी निवासमा समेत पठाएकी छन् । 
 

नागपुर इजलासमा वकालत गर्ने वकिलहरूको एक समूहले त्रिवेदीको कदमको आलोचना गरेका छन् र उच्च अदालत प्रशासनलाई उनीविरुद्ध उजुरी दर्ता गर्न तथा अदालतको अवहेलना मुद्दा दायर गर्न समेत माग गरेका छन् । 

आफ्नो कार्यको प्रतिरक्षा गर्दै त्रिवेदीले नाबालिग बालिकाहरूमागि गरिएका यौन दुर्व्यवहारका आरोपितलाई सफाइ दिने न्यायाधीशका फैसलाहरूले आफूलाई आक्रोशित पारेको बताइन् । 

‘गनेडीवालाले १२ वर्षीया बालिकाको कपडा नखोलिकन स्तन समात्ने पुरुषलाई छालाले छाला छोइएको थिएन भन्दै सफाइ दिइन् र त्यसको विरोध मैले कन्डम पठाएर गरेको हुँ । छालाको सम्पर्क नभएकाले ती पुरुषको कार्य यौन दुर्व्यवहारमा नपर्ने भनी उनले फैसला दिइन् । मलाई यो अनौठो लाग्यो र म ती बालिका तथा उनको परिवारको पीडा बुझ्न सक्छु,’ त्रिवेदीले भनिन् । 
 

त्रिवेदीले गनेडीवालाका विवादास्पद फैसलाको विरुद्ध अभियान शुरू गर्ने घोषणा पनि गरेकी छन् । 
 

गनेडीवालाको फैसलाको संज्ञान सर्वोच्च अदालतले तत्कालै लिएको र अन्तरिम रोक लगाएकोमा प्रशंसा गर्दै त्रिवेदीले विवादास्पद फैसलाका कारण बालिका न्यायबाट वञ्चित भएको बताइन् ।